| Il-Ministru għall-Ekonomija, Investiment u Negozji Żgħar, Chris Cardona, flimkien mal-Ministru għal Għawdex, Justyne Caruana u s-Segretarju Parlamentari għall-Fondi Ewropej u Djalogu Soċjali, Aaron Farrugia, żaru diversi xogħlijiet maġġuri li għaddejjin f’Għawdex bħalissa, fosthom is-sit tal-Ħofra u l-eks-MDP. Il-Ministru Cardona saħaq kif dan il-Gvern minn dejjem ta importanza kbira lil Għawdex u l-intraprenditorja Għawdxija. Il-pjan tal-Gvern hu li Għawdex isir aktar aċċessibli u dawn l-investimenti, li bdew fil-leġiżlatura li għaddiet, huma pedament importanti sabiex tintlaħaq din il-mira. Il-proġetti tal-Business Zone tal-Ħofra u l-eks-MDP f’Għawdex, huma żewġ proġetti li flimkien se joffru aktar minn 20 tomna ta’ art għal żvilupp industrijali ġewwa Għawdex. It-tisħiħ tal-infrastruttura industrijali se tpoġġi lil Għawdex fuq quddiem biex jattira investiment ġdid li jiddependi minn servizz effiċjenti u spazji moderni. “Dawn il-proġetti mhux biss se jirriġeneraw lil dawn is-siti, imma se nittrasformawhom sabiex jiġġeneraw aktar kummerċ u għaldaqstant nipprovdu futur liż-żgħażagħ Għawdxin,” qal il-Ministru Cardona. Il-Ministru Caruana qalet kif taħt dan il-Gvern, Għawdex qiegħed verament jingħata l-importanza li jixraqlu u dawn il-progetti huma xhieda ħajja ta’ kemm bqajna ngħixu din il-premessa. “Dawn huma proġetti importani għall-gżira Għawdxija mhux biss għax qed jindirizzaw in-nuqqasijiet li hemm bżonn fl-infrastruttura bażika, iżda wkoll ser jservu biex jiġu attirati investimenti ġodda f’Għawdex,” qalet il-Ministru Caruana. “Dan ser iwassal biex f’Għawdex ikomplu jinħolqu postijet ta’ xogħol ġodda u xogħol ta’ kwalità,” kompliet il-Ministru Caruana. Il-Ministru Caruana kkonkludiet billi semmiet d-diversi skemi li ġew imħabbra fil-budget li huma propju intiżi biex jinkoraġixxu impjiegi ġodda u, jassistu l-industrija u start-ups ikomplu jinvestu u jkattru x-xogħol fil-gżira Għawdxija. Is-Segretarju Parlamentari Farrugia qal li b’investiment kemm mill-fond konsolidat, kif ukoll mill-Fondi Ewropej, Għawdex qed isir il-mutur ekonomiku skont il-viżjoni tal-Gvern. Farrugia spjega li l-istrateġija għal Għawdex qed tgħin għal ħidma ħolistika biex Għawdex jieħu fair dealgħal Fondi Ewropej. Dan il-proġett tal-lum li qed jieħu €10miljun f’fondi mill-Fond Ewropew għall-Iżvilupp Reġjonali flimkien ma’ skemi li tħabbru riċentament tal-Business Enhance inkluż fondi għal riċerka żvilupp u innovazzjoni, l-imprenditur Għawdxi jista’ jilħaq l-aspirazzjonijiet u l-potenzjal tiegħu. |
