Għalkemm ir-Royal Malta Yacht Club kien ippjana tmiem il-ġimgħa ta’ tlielaq li kienu ser jibdew mill-Ġimgħa wara nofsinhar sat-Tnejn, l-International Yacht Paint Gozo Weekend kellu jaffaċċja xi tibdil minħabba l-irwiefen li affettwaw il-Gżejjer Maltin nhar il-Ġimgħa u s-Sibt. Madankollu, l-Uffiċjal tat-Tellieqa Martin Azzopardi addatta l-programm skedat, bit-tlielaq isiru nhar il-Ħadd u t-Tnejn. Dawn wasslu għal żewġ tlielaq eċċitanti minn Malta għall-Għawdex u lura.
Disa’ dgħajjes ħadu sehem fit-tellieqa tal-Ħadd, bi tmienja jieħdu sehem it-Tnejn. Minkejja l-iskeda mibdula, il-parteċipanti gawdew minn riħ favorevoli fil-jumejn ta’ tlielaq, li ppermetta kundizzjonijiet eċċellenti għal kompetizzjoni mill-aktar intensiva.
Il-flotta kienet magħmula minn taħlita tajba ta’ racers u cruisers, b’wirjiet notevoli fiż-żewġ kategoriji.
Ir-rebbieħ overall tal-International Yacht Paint Gozo Weekend kien Jonathan Gambin u l-ekwipaġġ tiegħu fuq Ton Ton Laferla. Dawn iċċelebraw ritorn b’saħħtu għat-tlielaq wara sena nieqsin. Fil-kummenti tiegħu dwar ir-rebħa, Gambin qal:
“Wara sena nieqsa mit-tlielaq, Ton Ton Laferla irritornat fix-xena tar-regatti lokali. Bil-għajnuna tas-sponsors tagħna, Laferla Insurance, ir-ritorn tagħna kien komplut, b’rebħa trijonfali fl-ewwel tellieqa tagħna. Grazzi lill-ekwipaġġ u lis-sponsors tagħna.”
Il-jott ta’ David Anastasi, Pippus, wera prestazzjoni b’saħħita wkoll, b’rebħa u tieni post fil-klassifika ġenerali. Pippus kiseb żewġ rebħiet konsekuttivi fil-Cruisers’ Class. Janissah ta’ Mario Debono u Stella R ta’ Steve Carter kisbu rebħa f’tellieqa kull wieħed, b’Janissah tispiċċa fit-tieni post u Stella R fit-tielet post fil-klassifika finali.
Fil-Klassi IRC2, kemm JYS Jan tal-Fondazzjoni Jarhead Young Sailors, taħt il-gwida ta’ Claudio Bugeja kif ukoll Maltese Falcon 2 ta’ Gintaras Chomentauskas kisbu rebħa kull wieħed. Madankollu, minħabba li ż-żewġ jottijiet spiċċaw f’parità għall-ewwel post, il-Kumitat tat-Tellieqa kellu jirrikorri għar-Racing Rules of Sailing sabiex tissolva s-sitwazzjoni. B’riżultat ta’ dan, Maltese Falcon 2ġiet iddikjarata rebbieħa tal-Klassi.
“L-International Yacht Paint Gozo Weekend wera mill-ġdid li, anke f’ temp mhux prevedibbli, il-komunità tal-ibburjdar f’Malta dejjem lesta taffaċċja kull sfida – b’determinazzjoni, ħila u mħabba lejn il-baħar.” stqarr Adrian Gauci Borda, Rear Commodore (Yachting) tar-Royal Malta Yacht Club.
Ċerimonja ta’ Premjazzjoni saret fir-Royal Malta Yacht Club fejn ir-rebbieħa rċevew t-trofej u l-premijiet mingħand Andrew Magri Overend, CEO tal-MacMed Group – rappreżentanti ta’ International Yacht Paint f’Malta. Magri Overend stqarr li “ Hekk kif nagħlqu dan l-avveniment, qed nirriflettu fuq is-sħubija tagħna mar-Royal Malta Yacht Club, u nikkonfermaw mill-ġdid l-impenn ta’ International Paint lejn l-eċċellenza fil-kura tal-jottijiet u l-ispirtu dejjiemi tal-ibburdjar. Sport li jdur mal-elementi tal-ħbiberija, il-komunità u l-imħabba lejn il-baħar. Insellmu lill-parteċipanti kollha u nħarsu ’l quddiem biex inkomplu nappoġġjaw iktar regatti fil-futur li jkomplu jipprovdu opportunitajiet eċċitanti għal din il-komunità.”
Il-Club rringrazzja lill-MacMed Group talli għal darb’oħra appoġġjaw il-programm ta’ tlielaq tal-Club kif ukoll lir-Race Management Team mmexxi minn Martin Azzopardi u assistit minn Adrian Gauci Borda, Michelle Caruana, Tania Bonnici, u Tania Steinbeck.
It-tellieqa li jmiss hija t-Tommy Hilfiger Fully Crewed Figure of 8 Race, li ser issir is-Sibt 12 ta’ April. Ir-reġistrazzjoni hija miftuħa fuq www.rmyc.org/races.
