F’dawn l-aħħar snin, Malta kisbet reputazzjoni b’saħħitha bħala destinazzjoni mfittxija għal studenti li jaspiraw li jsiru bdoti.
Mill-veduti pittoreski li joffri x-xogħol, għal kundizzjonijiet tat-temp favorevoli u d-dedikazzjoni tal-ħaddiema fi ħdan l-industrija, din il-gżira Mediterranja saret ċentru ta’ taħriġ tal-ogħla livell fis-settur tal-avjazzjoni.
Biex niksbu aktar għarfien tas-suċċess li qed tikseb din l-industrija, crew ta’ ONE News żar l-ewwel skola li bdiet toffri t-taħriġ lill-bdoti f’pajjiżna, sa mill-elf disa’ mija u tlieta u disgħin, il-European Flight School Academy.
Hemmhekk iltqajna ma’ Blin Hoxha, żagħżugħ mill-Kosovo li għażel lil Malta biex jirċievi t-taħriġ għall-bdot.
“Kelli ħafna ħbieb bdoti minn madwar id-dinja u ħafna rrakkomandaw lil Malta hekk kif hija pjuttost avvanzata fis-settur tal-avjazzjoni u t-temp huwa pjuttost tajjeb is-sena kollha.”
Tkellimna wkoll ma’ Aiden Borg Lupan, student Malti ta’ dsatax-il sena.
Huwa qasam magħna l-ambizzjoni li jimxi wara l-passi ta’ zijuh, li huwa bdot.
“Huwa ambjent pożittiv ħafna, kulħadd jgħin lil xulxin, bħala bdoti qedgħin komunità sabiħa ħafna, kulħadd jgħin lil xulxin fl-istudju kif ukoll biex nitgħallmu l-ħiliet minn xulxin.”
Spjegalna wkoll il-passi li student irid jieħu biex finalment jilħaq bdot.
L-ewwel jikseb il-liċenzja ta’ bdot privat, li tippermettilu biex isuq ajruplan nżgħir. Imbagħad, jekk ikun jixtieq ikompli fis-settur kummerċjali fi ħdan l-avjazzjoni, irid itella’ aktar sigħat fl-ajru u jgħaddi mit-teorija neċċesarja. Dan kollu possibbli jsir f’sentejn.
Finalment tkellimna ma’ Matthew Rota, id-Direttur tal-Kumpanija, li saħaq kif l-industrija qed timraħ minħabba l-iżvilupp qawwi li qed isir minn kumpaniji tal-ajru, fost oħrajn.
Tkellem ukoll fuq l-ammont b’saħħtu ta’ studenti barranin li qed jiġu Malta, tant li bejn ħamsin u sittin fil-mija tal-istudenti fl-iskola huma barranin.
Huwa żied jgħid li dawk interessati f’din il-karriera, jistgħu jibbenefikaw minn diversi skemi offruti.
“Hemm żewġ skemi, hemm waħda l-BOV loan scheme li tgħin lill-istudent jieħu loan għat-taħriġ kollu tiegħu, li hija tajba ħafna u hemm il-Jobsplus scheme li hija skema fejn jagħtuhom grant tul il-programm tagħhom.”
Mhux biss il-komunità li ġibdet lill-istudenti għal din il-karriera, hekk kif student minnhom saħaq li għalih, l-isbaħ veduta ta’ kwalunkwe uffiċċju fid-dinja hija dik ta’ bdot, li tieħdok mill-isbuħija tal-Alpi fl-Isvizzera sal-art mogħnija bl-isbaħ ġmiel f’pajjiżna.
Xi ħaġa li fihmniha fil-prattika, hekk kif crew ta’ ONE News ingħata l-opportunità jifhem dak li jesperjenzaw mill-qrib dawn l-istudenti waqt titjira tipika ta’ taħriġ.
Titjira li matulha, ma waqafniex nitpaxxew bl-isbuħija ta’ pajjiżna.
