Il-Ministru għall-Ġustizzja, Kultura u Gvern Lokali Owen Bonnici u l-Ministru għall-Ġustizzja Taljan Andrea Orlando, qablu li b’ kollaborazzjoni maż-żewġ naħat għandhom ikomplu jissaħħu l-mekkaniżmi biex tkun miġġielda l-kriminalità organizzata.
Waqt żjara uffiċjali li l-Ministru Orlando għamel f’Malta, huwa kellu tifħir partikolari għar-relazzjoni bilaterali tajba li Malta għandha mal-Italja. Iż-żewġ Ministri qablu li l-kollaborazzjoni b’saħħitha bejn iż-żewġ pajjiżi tista’ twassal għal effiċjenza rapida u żgurata meta nħarsu lejn l-iskambji tal-informazzjoni, u l-ħolqien ta’ front effiċjenti għall-ġlieda kontra l-kriminalità transnazzjonali.
Il-Ministru Bonnici u Orlando qalu li l-għan ewlieni tagħhom huwa li jikkumbattu l-kriminalità organizzata, fuq livell ta’ kooperazzjoni internazzjonali, biex tkun assigurata ssir ġustizzja f’waqtha.
Il-Ministru Bonnici qal li għandna relazzjoni u kooperazzjoni eċċellenti mal-Italja, u apparti li ġie diskuss kif jistgħu jitħaffu l-iskambji ta’ informazzjoni u ħidma biex tiġi miġġielda l-kriminalità organizzata, huwa qal li l-Italja għandha esperjenza kbira f’dan il-qasam.
“Sintendi aħna rridu nimxu biex insaħħu dawn ir-relazzjonijiet bejn Malta u l-Italja billi niffaċilitaw il-ħidma bejnietna, u nkomplu nibnu biex jekk ikun hemm reat li jsir fl-Italja jew Malta nkunu veloċi biex nagħmlu ġustizzja u min jagħmel xi ħaġa kontra l-liġi jieħu dak li ħaqqu.”
Waqt din iż-żjara uffiċjali qasira, il-Ministru Orlando u d-delegazzjoni tiegħu kellhom laqgħa mal-Prim Ministru Joseph Muscat, akkumpanjati mill-Ministru Bonnici. Il-Ministru Orlando faħħar l-eżekuzzjoni b’saħħitha ta’ Malta waqt li kellha t-titlu tal-Presidenza tal-Unjoni Ewropea aktar kmieni din is-sena.
