Il-Pulizija arrestat persuna ta’ 45 sena b’rabta ma’ serqa li seħħet minn residenza ta’ anzjana. Waqt l-arrest instabu wkoll l-ġojjellerija kollha li nsterqu mir-residenza.
L-Assistent Kummissarju Alexandra Mamo, responsabbli mis-Sitt Distrett, qalet li “minkejja l-ġranet twal sabiex ninforzaw il-liġijiet fejn tidħol il-COVID-19, ix-xogħol tagħna baqa’ għaddej. Kien ta’ pjaċir tagħna li meta l-anzjana ġiet l-għassa biex inkellmuha, rajna wiċċha jixgħel hekk kif infurmajniha li solvejna l-każ f’ħin relattivament qasir.”
Ilbieraħ wara nofsinhar, il-Pulizija ġiet infurmata li kienet għadha kemm seħħet serqa minn residenza ta’ anzjana ta’ 79 sena fl-Imsida. Mill-ewwel stħarriġ illi sar rriżulta li mara ħabtet il-bieb ta’ barra tar-residenza, liebsa surgical mask ma’ ħalqha u li qalet lill-anzjana li hija qed tirrappreżenta kumpanija li tgħin lill-persuni vulnerabbli. Jidher li l-mara aljenat lill-anzjana u serqitha.
L-Assistent Kummissarju Mamo, qalet li “minn stħarriġ li sar, immexxi mill-Ispettur Jonathan Ransley, irriżulta li l-kumpanija, li semmiet l-persuna li allegatament wettqet is-serqa, ma kienet bagħtet lil ħadd għand l-anzjana. L-appell tagħna, speċjalment lill-persuni vulnerabbli, huwa biex ma jiftħu lil ħadd u ma jdaħħlu lil ħadd fid-dar jekk ma jkunux qed jistennew lil xi ħadd li jafu u jkun se jmur għandhom. Jekk ikollhom suspett, iċemplu mill-ewwel lill-Pulizija.”
Minn aktar stħarriġ illi sar irriżulta li mill-kamra tas-sodda insteraq ammont ta’ ġojjellerija. L-investigazzjonijiet issoktaw fis-sigħat ta’ wara fejn ġiet identifikata l-persuna li allegatament wettqet is-serqa u ġiet arrestata filgħaxija. L-oġġetti misruqa instabu wkoll.
L-investigazzjonijiet tal-Pulizija dwar dan il-każ għadhom għaddejjin.
