Fl-2016, is-swali taċ-ċinema f’Malta u Għawdex urew 391 film differenti u kellhom total ta’ 672,487 ammissjoni. Bl-aktar films popolari kienu Finding Dory, Deadpool u The Secret Life of Pets.
Is-sena li għaddiet f’pajjiżna kellna tmien swali taċ-ċinema miftuħa għall-pubblika, li tnejn minnhom jinsabu f’Għawdex. Skont statistika maħruġa mill-Uffiċċju Nazzjonali għall-istatistika dawn is-swali kellhom total ta’ 35 screen u jesaw 6,771 persuna. 26 minn 35 sala taċ-ċinema kienu aċċessibbli għal persuni b’diżabbiltà.
Minkejja li n-numru ta’ films li ntwerew fis-swali taċ-ċinema żdiedu b’sittax meta kkumparat mal-2015, l-ammissjonijiet fiċ-ċinemas naqsu b’4.4% meta mqabbel mas-sena ta ‘qabel jiġifieri laħqu 673,487.
Kienu 11,036 persuna li marru ċ-ċinema biex jaraw produzzjoni Maltija, 1.6% mit-total ta’ ammissjonijiet fl-2016. Bħala medja, il-produzzjonijiet Maltin damu aktar żmien meta mqabbel ma’ produzzjonijiet barranin fis-swali taċ-ċinema.
Meta mbagħad inħarsu lejn in-numru ta’ impjegati fis-swali taċ-ċinema, is-sena li għaddiet kienu impjegati f’dan is-settur 187 persuna li 84% minnhom kienu jaħdmu fuq bażi part-time.
