Il-binja li ġġarrfet fit-3 ta’ Diċembru li għadda f’Kordin u li ħalliet mejjet lil Jean Paul Sofia kienet riżultat ta’ numru ta” nuqqasijiet ewlenin fosthom li d-disinn strutturali tal-binja naqas milli jieħu inkonsiderazzjoni aspetti importanti fosthom l-istabbiltà tal-ħitan u anki ma ngħatax kas ta’ irbit meħtieġ tal-istruttura.
Dan joħroġ ċar fir-rapport tal-inkjesta maġisterjali mmexxija mill-Maġistrat inkwirenti Marseanne Farrugia li tmien xhur wara l-inċident ikkonkludiet l-inkjesta.
B’kollox il-Maġistrat għamlet sittax-il seduta fejn f’mument minnhom għal xahar u nofs, jiġifieri mas-46 jum ma laqqgħetx seduta waħda fil-proċess tal-maġistratura inkwirenti.
Mir-rapport li ta anki l-Perit Alex Torpiano, li tqabbad mill-Maġistrat Farrugia, jidher li kien hemm ftit jew kważi l-ebda rbit bejn l-elementi tal-binja, fis-sens ta’ ħadid li jgħaddi minn element għal ieħor.
“Dan l-irbit huwa partikolarment importanti għall-integrità ta’ binja f’każ ta’ inċident”, spjega l-Perit Torpiano.
Torpiano, li eżamina l-pjanti tal-binja inkwistjoni li ħejjiet il-Perit Adriana Zammit, waħda mill-akkużati li kkaġunat il-mewt involontarju ta’ Jean Paul Sofia, qal li fil-pjanti jidhru dettalji tal-blajjet u kien hemm struzzjonijiet dwar il-ħadid li kellu jitwaħħal ġol-blajjet iżda ma kien hemm l-ebda struzzjoni dwar x’ħadid kellu jintrabat minn blata għal oħra.
“Il-pjanti jsemmu spreader beam iżda li kien hemm bżonn huwa tie beam jew ring beam, jiġifieri ċintorin rinforzat mad-dawra kollha tal-perimetru tal-binja”, saħaq Torpiano fl-inkjesta maġisterjali li biha setgħu jitressqu n-nies fil-Qorti biex iwieġbu ta’ għamilhom.
Fl-evalwazzjoni tiegħu, il-Perit Torpiano spjega li ħajt tal-binja waqa’ eżatt qabel iġġarraf is-saqaf.
Intant jirriżulta li l-ħaddiema li kienu qed jaħdmu fuq il-binja ma kellhomx għarfien biżżejjed fix-xogħol.
Fil-fatt il-ħaddiema li anki weġġgħu dakinhar tal-każ qalu li ma kellhomx kwalifiki għajr Lulzim Carku, Albaniż ta’ 20 sena, li qal li kien għamel kors ta’ taħriġ f’pajjiżu u f’Malta kien għamel kors ta’ nofs ta’ nhar f’post li lanqas hu ċar kienx liċenzjat.
Kien hemm ukoll nuqqas ta’ kontinwità fix-xogħol fejn daqqa kien hemm ħaddiema u daqqa oħrajn u ma kienx jinżamm reġistru ta’ min dieħel u ħiereġ fuq sit ta’ kostruzzjoni li jikkostitiwixxi f’perikli.
Mill-inkjesta rriżulta li Jean Paul Sofia kien jibgħat ir-ritratti tax-xogħol lil Matthew Schembri, li kien responsabbli fuq il-lant tax-xogħol, u Schembri mhux dejjem kien ikun preżenti fuq l-art ta’ Kordin, jiġifieri kien isegwi u joqgħod fuq ir-ritratti.
Sofia fil-fatt bagħat l-aħħar ritratt tal-ħaddiema jaħdmu eżatt ftit qabel waqgħet il-binja, dakinhar tat-3 ta’ Diċembru.
Il-ħaddiema qalu wkoll li qatt ma lemħu lill-Perit Adriana Zammit għalkemm jingħad li hi ġieli marret fuq is-sit tal-kostruzzjoni u jidher li kienet toqgħod ukoll fuq ritratti mibgħuta lilha.
Fl-inkjesta jingħad ukoll kif il-firma ta’ John Muscat, il-bennej bil-liċenzja ġiet iffalsifikata fuq l-avviż tal-bidu tal-proġett.
Allegatament iffalsifika l-firma, l-iżviluppatur Matthew Schembri.
Fil-fatt huwa qed jaffaċċja akkuża dwar dan fil-Qorti wara r-rapport tal-inkjesta maġisterjali.
