Matul Novembru, bħala rikonoxximent u apprezzament lejn il-klijenti kontribwixxew, saret Open Day fil-kumpless ta’ Da Vinci Health f’Birkirkara, fejn kienu ppreżentati fondi lil Missio Malta wara inizjattiva li ħadet din il-kumpanija b’risq ħaddieħor.
ONE News tkellem ma’ Robert Farrugia minn Missio Malta.
“Din l-għotja ħa tfisser ħafna għax ħa nkunu qed inkomplu fejn ħallejna l-isptar fl-Uganda, fejn jonqsu żewġ proġetti, wieħed mill-proġetti huwa li nibni sala tal-operazzjonijiet biex inkomplu nsalvaw tfal u nisa li jkunu qed iwelldu għax s’issa hemm dan in-nuqqas u jekk tinqala emerġenza dawn iridu jivjaġġaw fit-tul, u ħafna drabi jintilfu l-ħajjiet.”
L-għan ta’ dan l-avveniment kien li titqajjem kuxjenza dwar l-importanza tal-kura tas-saħħa preventiva u l-identifikazzjoni bikrija ta’ mard li wieħed jista jkollu bla ma jaf.
Biswit wirja ta’ pitturi li ttelgħet fl-istess kumpless għall-istess għan, tkellimna mal-Kap Eżekuttiv ta’ Da Vinci Health, Pierre Vassallo.
“Bħala kumpanija aħna dejjem naħdmu għall-proxxmu, jiġifieri naħdmu għall-pazjenti tagħna, u għall-klijenti u anki għall-istaff tagħna imma aħna nħossu li għandna dik li ngħidulha il-Corporate Social Responsibility, nħossu li għandna nagħtu mhux biss lil min jiġi hawnhekk imma lil dawk li qatt ma ġew hawnhekk għax ma jistgħux jiġu, u li għandhom ħafna bżonn. Din l-inizjattiva ilna li bdejniha jien u marti mill-2012, dejjem ġbarna l-flus għall-entitajiet differenti.”
Huwa qalilna li wieħed għadu jista’ jagħti l-għotjiet tiegħu b’risq Puttinu Cares permezz ta’ Revolut fuq 79491300.
