F’Jum l-Awtiżmu, mart il-Prim Ministru Lydia Abela żaret faċilità ta’ childcare f’Ħ’Attard li mil-lum beda joffri servizzi speċjalizzati għat-tfal.
Dan huwa wieħed minn erba’ ċentri simili li nfetħu fl-aħħar għaxar snin mill-imprenditriċi Charmaine Caruana.
Kull ċentru jilqa’ fih madwar 30 tifel u tifla, b’50 professjonist li jaħdmu b’dedikazzjoni biex jipprovdu l-aqwa kura u edukazzjoni.
Waqt l-inawgurazzjoni ta’ sensory room ġdida, Dr Abela setgħet tapprezza mingħand it-tfal u l-ħaddiema ta’ dan iċ-ċentru kif din il-faċilità se tkompli ttejjeb is-servizzi offruti.
Mart il-Prim Ministru qalet li dan se jkun pass ieħor lejn il-ħolqien ta’ ambjent li jwieġeb aħjar għall-ħtiġijiet tat-tfal kollha.
Saħqet li huwa pożittiv li pajjiżna qed ikompli joffri iktar servizzi li jgħinu lit-tfal jiżviluppaw bl-aħjar mod possibbli u jiksbu l-potenzjal sħiħ tagħhom.
Dr Abela temmet tgħid li Malta trid tkompli tkun vuċi b’saħħitha għall-inklużjoni biex is-soċjetà tagħna tibqa’ toffri sostenn u opportunitajiet lil kulħadd.
