B’investiment ta’ €2 miljun, li huwa kkofinananzjat minn Fondi tal-Unjoni Ewropea ġiet inawgurata sistema ġdida fil-kamra tal-kontroll tad-Dipartiment tal-Protezzjoni Ċivili.
Dan tħabbar mill-Ministru għall-Intern u s-Sigurtà Nazzjonali Byron Camilleri, flimkien mas-Segretarju Parlamentari responsabbli mill-Fondi Ewropej Stefan Zrinzo Azzopardi.
Din il-kamra tal-kontroll ġdida taħdem b’sistema ta’ intelliġenza artifiċjali, fejn dak il-ħin il-ħaddiema tad-Dipartiment tal-Protezzjoni Ċivili se jkunu jafu bl-informazzjoni u l-post eżatt fejn hemm il-ħtieġa tal-ewwel għajnuna. Din is-sistema turi l-vetturi tat-tifi tan-nar fejn ikunu qegħdin u minn liema stazzjoni telqu.
Dwar din is-sistema kif taħdem, ONE News tkellem mad-Direttur tal-Protezzjoni Ċivili Emmanuel Psaila.
Qal kif, “Biha ħa jkollok affarijiet illi diġà lesti, fis-sens meta daħlet telefonata mhux ħa noqogħodu nsaqsu minn moħħna, għandek lista ta’ mistoqsijiet, skont x’inhu l-każ u skont ir-risposta illi jtuna n-nies, timxi għall-mistoqsijiet l-oħra. Barra min hekk, sa dak il-ħin illi tkun dieħla t-telefonata jibdew ikunu dispeċjati l-fire engines li hemm bżonn, għaliex jekk għandek bżonn rescue għandek bżonn vetturi, għoli għandek bżonn tip ta’ vetturi oħra u s-sistema mill-ewwel tgħidlek liema tip ta’ trakkijiet u mil-liema stazzjon għandek toħroġ.”
Waqt din il-konferenza tal-aħbarijiet, il-Ministru Byron Camilleri qal kif dan l-investiment se jgħin sabiex il-ħaddiema tal-Protezzjoni Ċivili jkunu fuq il-post mal-ewwel u jsalvaw ħajjet in-nies. Il-Ministru Camilleri qal ukoll kif ir-riżors uman huwa importanti barra din is-sistema u fakkar kif il-Gvern investa fihom permezz tal-ftehim kollettiv li sar is-sena l-oħra, li tejbilhom il-pagi u l-kundizzjonijiet tax-xogħol.
Spjega, “Fil-Protezzjoni Ċivili qed nagħmlu investiment bla preċedent, mhux biss fil-ħaddiema tagħna iżda anke fil-makkinarju li jużaw u wieħed mill-aktar affarijiet importanti fil-Protezzjoni Ċivili hi li jingħata fl-inqas ħin possibli, is-servizz li hemm bżonn. U allura dan l-investiment ta’ €2 miljun se jgħin sabiex il-Protezzjoni Ċivili jagħtu servizz tajjeb, kemm jista’ jkun fl-inqas ħin possibli lil Maltin u Għawdxin.”
Min-naħa tiegħu, is-Segretarju Parlamentari Stefan Zrinzo Azzopardi qal kif miljun u nofs minn dan l-investiment ġie minn fondi tal-Unjoni Ewropea.
Qal, “Id-Dipartiment tal-Protezzjoni Ċivili bbenefika minn proġett importanti ferm b’investiment ta’ fondi tal-Unjoni Ewropea. Filfatt qed naraw investiment ta’ €1.5 miljun, investiment li se jagħti aktar effiċjenza, aktar għodod biex dan id-Dipartiment iku jista’ jagħti servizz aqwa u fuq kollox, fit-tellieqa tal-ħin sabiex jagħti dan is-servizz, dawn l-għodda l-ġdida se jkunu ta’ għajnuna kbira.”
Preżenti wkoll kien hemm il-Kap taċ-Ċivil Mario Cutajar li qal kif mill-2013 ‘il hawn kien hemm bidla kbira f’dan id-dipartiment, hekk kif il-ħaddiema tad-Dipartiment tal-Protezzjoni Ċivili bdew jiġu trattati ħafna aħjar minn qabel.
