B’investiment ta’ żewġ miljuni u nofs ewro, li huma ko-finanzjati minn fondi Ewropej ġew inawgurati żewġ proġetti ta’ restawr fil-Kon-Katidral ta’ San Ġwann.
Dan il-proġett ta’ restawr jinkludi l-Oratorju, li nbena fl-1604, li fih 13-il pittura ta’ Mattia Pretti u l-l-kapolavur ta’ Michelangelo Merisi magħruf bħala Caravaggio, dik tal-qtugħ ta’ ras ta’ San Ġwann il-Battista.
Il-Kuratur ta’ dan il-Kon-Katidral, Cynthia Degiorgio qalet kif dan l-Oratorju nbena mill-Gran mastru Wignacourt. Hija qalet, “Għax ried ikollu kamra, chamber fejn jistgħu n-novizzi jitolbu u jiġu ppreparati għall-knighthood. U mal-ewwel ħaseb biex ikun hemm pittura kbira li tista’ timla’ l-ħajt bil-martirju ta’ San Ġwann. L-Ambaxxatur tiegħu li kien Napli kien jaf illi Caravaggio kien maħrub minn Ruma u tah l-opportunità jiġi Malta.”
Barra minn hekk dan ir-restawr jinkludi wkoll ix-xogħol fuq Caravaggio Wing, li fih hemm il-pittura famuża ta’ Caravaggio ta’ San Ġilormu u l-viżitaturi jistgħu jsegwu dwar il-ħajja ta’ dan l-artist famuż.
Degiorgio spjegat magħna kif f’dan ir-restawr inbidel id-dawl ta’ dan il-post, fejn wieħed jista’ jara aħjar l-artifatti mingħajr ma jagħmel ħsara lill-pitturi.
Dan ir-restawr ġie inawgurat fl-għoxrin anniversarju mill-Fondazzjoni tal-Kon-Katidral ta’ San Ġwann u saru diversi attivitajiet b’rabta ma’ dan l-anniversarju.
Huwa sostna: “Organizzajna konferenza Ewropea, fejn stediena diversi kuraturi u restawraturi li ddiskutejna proġetti ta’ restawr u konservazzjoni f’diversi Katidrali Ewropej. B’dan il-mod aħna poġġejna l-Kon-Katidral ta’ San Ġwann f’network ta’ Katidrali Ewropej u kkonsolidajna l-pożizzjoni tiegħu.”
Preżenti għal din l-inawgurazzjoni kien hemm il-Ministru għall-Kultura u Wirt Nazzjonali José Herrera li qal kif hawnhekk se jkun hawn mużew tal-ogħla livell.
Il-Ministru Herrera sostna: “Kemm mill-aspett illi eleva l-aspett kulturali ta’ pajjiżna, diġà biżżejjed. Però għandu aspett ekonomiku qawwi wkoll għax jiġġenera ħafna attività ekonomika mit-turiżmu. Jiġu hawnhekk ‘il fuq minn 400,000 turist. Ara kemm jiġġenera attività kummerċjali.”
Is-Segretarju Parlamentari għall-Fondi Ewropej Stefan Zrinzo Azzopardi qal kif dawn il-fondi tal-Unjoni Ewropea qed ikunu ta’ importanza sabiex nibżgħu u nżommu fl-aħjar stat il-patrimonju ta’ pajjiżna.
Huwa tenna: “Qegħdin naraw investiment ta’ €2 miljun minn Fondi Ewropea li qegħdin ninvestuhom f’wieħed mill-aktar moumenti nazzjonali ta’ pajjiżna.”
