Wara s-suċċess tal-ewwel pitch tal-boċċi fid-dar tal-anzjani tal-Imtarfa, issa ġie inawgurat it-tieni pitch tal-boċċi f’dar residenzjali – din id-darba f’Dar il-Madonna tal-Mellieħa. Dan il-proġett, immexxi mill-Anzjanità Attiva u Kura fil-Komunità (AAKK), huwa parti mill-impenn kontinwu biex jiġu offruti aktar opportunitajiet ta’ attività fiżika u soċjali għall-anzjani.
Dan il-pitch tal-boċċi ġie mibni f’Dar il-Madonna tal-Mellieħa wara li numru ta’ residenti wrew interess qawwi f’dan l-isport u ħadu sehem ukoll fil-ftuħ tal-pitch tal-Imtarfa. F’dan il-proġett ingħatat attenzjoni speċjali lill-aċċessibbiltà biex persuni b’diffikultajiet fiżiċi, inkluż dawk li jużaw siġġu tar-roti, ikunu jistgħu jipparteċipaw.
Is-Segretarju Parlamentari għall-Anzjanità Attiva, Malcolm Paul Agius Galea, saħaq li dawn l-inizjattivi qed juru kif l-investiment fl-attività fiżika u soċjali qed jagħti riżultati tajbin. “L-esperjenza fil-pitch tal-Imtarfa wrietna li l-anzjani qed jieħdu gost b’dan l-isport u għalhekk komplejna ninvestu. Issa qed naħdmu biex nidentifikaw żoni f’aktar djar residenzjali, inkluż f’San Vinċenz de Paul, sabiex ninvestu f’aktar spazji fejn l-anzjani jkollhom il-possibbiltà li jipparteċipaw f’dan l-isport li jgħinhom jibqgħu attivi kemm mentalment kif ukoll fiżikament”, temm jgħid is-segretarju parlamentari.
L-isport tal-boċċi mhux biss joffri attività fiżika u mentali iżda wkoll jinkoraġġixxi l-interazzjoni soċjali, speċjalment fost l-irġiel li spiss joqogħdu lura milli jipparteċipaw f’attivitajiet oħra.
Il-pitch se jkun disponibbli għar-residenti tad-dar, dawk li jattendu ċ-Ċentru ta’ Matul il-Jum, kif ukoll għall-anzjani mill-komunità. L-AAKK qed tippjana wkoll tournaments bejn djar residenzjali u l-komunità, sabiex l-anzjani jkollhom aktar opportunitajiet biex jiltaqgħu u jieħdu gost flimkien.
