It-Tnejn filgħodu ġie inawgurat mużew ekkleżjastiku biswit is-Santwarju Nazzjonali tal-Madonna tal-Mellieħa.
Dan b’investiment konġunt ta’ kważi €650,000 mill-Awtorità Maltija għat-Turiżmu, il-Fondazzjoni għall-Patrimonju Kulturali tal-Arċidjoċesi ta’ Malta u fondi Ewropej.
Fil-fatt, taħt temp mill-isbaħ f’ġurnata xitwija fil-Mellieħa, ġie spjegat li, permezz ta’ dan il-proġett, waħda mill-eqdem binijiet fil-Mellieħa nbidlet f’mużew li jesponi storja kulturali reliġjuża li tmur lura għas-Seklu Sittax. B’hekk issa din il-binja se tiġi utilizzata bħala attrazzjoni ġdida għal kull min iżur il-Mellieħa matul is-sena kollha, inkluż it-turisti.
Dawn id-dettalji tħabbru waqt ċerimonja tal-inawgurazzjoni uffiċjali li għaliha attendew il-Ministru għat-Turiżmu, Clayton Bartolo, is-Segretarju Parlamentari għall-Fondi Ewropej, Chris Bonett, l-Arċisqof Awżiljarju, Joseph Galea Curmi, l-Arċipriet tal-Parroċċa tal-Mellieħa, Joe Caruana, il-membri tal-Kunsill tal-lokal, rappreżentanti tal-Awtorità Maltija għat-Turiżmu, il-Fondazzjoni għall-Patrimonju Kulturali tal-Arċidjoċesi ta’ Malta u mistednin distini oħrajn.
Il-Ministru Bartolo rrimarka kif dan il-mużew ekklesjastiku hu opportunità li, permezz tiegħu, pajjiżna jkompli jsaħħaħ il-prodott tiegħu fejn tidħol in-niċċa tat-turiżmu reliġjuż.
“Malta diġà hi l-inqas pajjiż staġjonali fil-Mediterran u allura qegħdin nibnu fuq dan is-suċċess Qegħdin nibnu fuq dawn il-pedamenti sodi biex ikollna aktar attrazzjonijiet matul ix-xhur tax-xitwa biex iġiegħlu lit-turist jagħżel lil pajjiżna.”
Min-naħa tiegħu, is-Segretarju Parlamentari għall-Fondi Ewropej qal li, kif jixhed proġett bħal dan, l-għajnuna ta’ fondi Ewropej, flimkien ma’ dawk nazzjonali, qegħdin jintużaw biex jiġu kkonservati diversi oqsma tal-wirt kulturali ta’ pajjiżna, filwaqt li jiżdied il-valur tal-prodott turistiku Malti.
“Dan hu l-iskop li għalih użajna dawn il-fondi Ewropej, għax ridna naraw li nħallu lil ġenerazzjonijiet ta’ warajna xi ħaġa li jkunu kburin biha. Ovvjament issa nistennew lill-pubbliku li jiġu jaraw dawn il-postijiet, għax verament huma ġojjelli li jinsabu f’pajjiżna.”
