Tlesta l-proġett ta’ restawr fuq il-faċċata, il-koppla, u l-kampnari tal-Knisja Parrokkjali tan-Naxxar b’investiment ta’ €155,500, li 80 fil-mija minnhom kienu kofinanzjati minn fondi tal‑Unjoni Ewropea.
Dan tħabbar waqt konferenza tal-aħbarijiet li saret fuq iz-zuntier tal-Knisja Parrokkjali fl-okkażjoni tal-inawgurazzjoni mill‑Isqof Awżiljarju, Joseph Galea‑Curmi, u mis‑Segretarju Parlamentari għall‑Fondi Ewropej, Chris Bonett.
Preżenti wkoll kien hemm is‑Segretarju Amministrattiv tal‑Arċidjoċesi ta’ Malta, Michael Pace-Ross, u l-Arċipriet Dun David Gauci, li spjega kemm kien bżonnjuż dan ir-restawr.
Qal, “Biż-żmien, l-elementi tan-natura. ir-raxx tal-baħar, xita, il-ġebla bdiet tiddeterjora mhux ħażin u allura kien hemm bżonn li jsir restawr estensiv, kif fil-fatt sar, fil-ġebla, kemm fil-faċċata, kemm fil-kampnari, u kemm fil-koppla ta’ din il-faċċata.”
Grazzi għal dan il‑proġett, li għalih ikkontribwixxew ukoll il-parruċċani tan-Naxxar, tnaddfet il-ġebla tal‑faċċata u tal-kampnari u xi wħud mill-ġebel, b’mod partikolari dak fin-naħa ta’ fuq, kellu jinbidel minħabba deterjorazzjoni tal‑ġebla kawża tal‑esponiment għall‑elementi naturali u t‑tniġġis tal‑arja.
Ġew irrestawrati wkoll l-aperturi tal-injam u tal-ħadid ta’ mal-faċċata filwaqt li xi wħud minnhom reġgħu saru mill-ġdid. Matul il-proċess sar ukoll xogħol intensiv fuq il-koppla minn barra sabiex ma ssirx iktar ħsara lill-ġebla u sabiex il-knisja terġa’ lura għas-sbuħija oriġinali tagħha.
L‑Isqof Galea‑Curmi qal li, matul dawn is-sentejn ta’ pandemija, il-Knisja baqgħet għaddejja bil-proġetti ta’ konservazzjoni u restawr f’diversi parroċċi u knejjes.
Is‑Segretarju Parlamentari Chris Bonett qal li dawn huma proġetti li b’mod tanġibbli juru l-utilità tal-fondi Ewropej. F’dan il-kuntest, saħaq dwar l-importanza tal-użu tal-fondi Ewropej sabiex ikunu jistgħu jsiru dawn il-proġetti li mhux biss jippriservaw il-kultura Maltija iżda wkoll jesponuha għat-turisti.
Qal, “Dan il-proġett mhux se jieqaf hawn u se nkomplu għaddejjin issa b’xogħlijiet f’Bormla u fil-Qrendi, u anke fil-mużew il-ġdid li se jsir fis-Santwarju tal-Mellieħa. Allura looking forward biex inkomplu għaddejjin b’dan ix-xogħol u mill-pakkett ta’ fondi l-ġdid inkomplu nagħmlu iktar minn dawn it-tip ta’ proġetti biex inkomplu nkabbru lil pajjiżna mhux biss mill-aspett ta’ saħħa u edukazzjoni iżda wkoll fil-kultura tiegħu.”
Intant, fid‑diskors tiegħu, Michael Pace-Ross qal li x-xogħol li sar fuq il-knisja tan-Naxxar jagħmel parti minn programm ta’ restawr ta’ knejjes u kappelli u ta’ konservazzjoni ta’ opri tal-arti li tnieda tliet snin ilu u li oriġinarjament kien jinkludi 15-il proġett.
Ħabbar li, fil-ġimgħat u x-xhur li ġejjin, se jiġu inawgurati aktar proġetti u l-Arċidjoċesi se toħroġ sejħiet għal offerti għall-aħħar ftit proġetti li fadal f’din l-iskema. Sostna li meta, sas-sena d-dieħla, ikunu tlestew il-proġetti kollha, il-Knisja se tkun investiet €4.5 miljun fil-patrimonju reliġjuż, li 80 fil-mija minnhom ġejjin minn fondi Ewropej.
