It-Tnejn filgħaxija, f’Joanne Gardens Ħal Tarxien ġie inawgurat bust tal-Patri Agostinjan Fr Hilary Tagliaferro xogħol l-artist Indri Attard. Dan seħħ waqt ċelebrazzjoni fl-okkażżjoni ta’ egħluq id-90 sena mit-twelid tal-Father kif inhu magħruf ma’ dawk kollha qrib tiegħu.
L-inizjattiva għal dan il-mafkar ttieħdet minn kumitat iffurmat minn ex membri tal-Oratorju tal-Agostinjani f’Ħal Tarxien bil-koperazzjoni tal-Kunsill Lokali ta’ Ħal Tarxien u diversi entitajiet li għenu fil-finanzjament.
Is-serata kommemorattiva kienet indirizzata minn diversi persuni li b’xi mod jew ieħor kienu affetwati pożittivament mill-azzjonijiet altruwistiki ta’ Fr Hilary. Fost dawn Norman Darmanin Demajo, President tal-Youth FA, li ħabbar li kienet se titwaqqaf il-Fondazzjoni Live It With Love sabiex tgħin lil dawk il-familji li ma setgħux iħallsu l-miżati jew il-kits lit-tfal tagħhom li xtaqu jattendu n-nurseries.
Live It With Love hija frażi li jħobb jgħid Fr Hilary meta jirreferi għal-logħba tal-futbol.
