Kitba tal-opinjonist Rodrick Zerafa
L-ambjent huwa prijorità. Mhux bil-kliem, imma bil-fatti. F’dawn l-aħħar sentejn, il-Gvern nieda u rriġenera ’l fuq minn 150,000 metru kwadru ta’ spazji miftuħa ġodda. Dan mhux biss numru fieragħ miktub fuq karta, iżda jħalli impatt konkret u dejjiemi fuq il-kwalità tal-ħajja tagħna lkoll.
Minn Ġnien Spencer fil-Marsa sa Wied Inċita f’Ħal Attard, u minn Ġnien il-Glażiż għal Wied Fulija u l-Qortin, kull spazju miftuħ ġdid jew irriġenerat jirrappreżenta impenn lejn futur aktar nadif u komunitajiet aktar b’saħħithom. Din hija l-bidla li rridu naraw, bidla li telqet minn politika falluta ta’ miżbliet u negliġenza u għall-bidla li toħloq ambjent li jitgawda min-nies, mill-familji u mit-tfal tagħna.Qed naraw 118-il proġett b’investiment ta’ €350,000 biex jagħmlu d-differenza. U l-ħidma tkompli. Fl-2025, Project Green mistennija tiftaħ 19-il proġett ġdid ta’ spazji miftuħa li jkopru 8,000 metru kwadru. Din mhix biss ħidma ta’ infrastruttura, iżda ħidma li tinvesti fil-ħajja tan-nies u fl-ispazji li jżommu lill-komunitajiet tagħna magħquda. L-ispazji ħodor mhumiex biss proġetti biex isebbħu l-lokalitajiet tagħna, iżda postijiet fejn il-komunità tingħaqad u fejn il-Maltin u l-Għawdxin jistgħu jgawdu ambjent aktar nadif u rilassanti.
Biex inkabbru din il-viżjoni, kull metru kwadru li jista’ jinbidel f’żona ħadra, se jinbidel. Bulebel huwa eżempju ċar ta’ kif il-Gvern qed jagħmel il-prijorità tiegħu li kull biċċa art tinbidel f’valur għall-komunità. U hemm aktar. L-iskema ‘Vjal Kulħadd,’ b’investiment ta’ €10 miljun, qed tgħin biex il-lokalitajiet tagħna jsiru isbaħ u aktar siguri. Il-miri huma ċari: aktar siġar, aktar arja friska, inqas traffiku u ambjent li jistimula l-ħajja ta’ kuljum tan-nies b’mod pożittiv.
Dan l-impenn jista’ jidher b’mod ċar f’postijiet bħal Ħaż-Żabbar, fejn il-Gvern investa madwar €1.7 miljun fi tliet spazji ħodor ġodda li qed iħallu differenza. Minn spazji rikreattivi ġodda għal żoni fejn il-familji jistgħu jirrilassaw, dawn il-proġetti mhux biss se jtejbu l-kwalità tal-ħajja tar-residenti iżda se jżidu l-valur ambjentali u estetiku tal-lokalità.
Fl-istess ħin, qed nieħdu azzjoni anke fuq il-klima. Mhux biżżejjed li nitkellmu dwar il-bidla fil-klima, imma rridu nieħdu passi bil-fatti, biex innaqqsu l-effetti tagħha. Kien għalhekk li twaqqfet l-Climate Action Authority biex inwasslu l-pajjiż għal direzzjoni aktar sostenibbli u effiċjenti. L-implimentazzjoni tal-Offshore Floating Wind Farms huwa wkoll pass sinifikanti lejn enerġija aktar nadifa u rinnovabbli.
L-infrastruttura u l-enerġija huma wkoll pedamenti essenzjali. Matul dawn l-aħħar xhur, inbidlu u sar xogħol fuq implimentazzjoni ta’ 140km ta’ cables, filwaqt li saret riġenerazzjoni tas-substations elettriċi. Iż-Żona Industrijali tas-Siġġiewi se jkollha distribution centre ġdid li jsaħħaħ l-affidabbiltà tas-sistema. Il-pajjiż għandu biżżejjed enerġija għad-domanda tiegħu. Din mhix kwistjoni ta’ provvista, iżda kwistjoni ta’ titjib fis-sistema tad-distribuzzjoni. U dan qed nagħmluh b’serjetà.
L-ambjent u l-kwalità tal-arja fil-portijiet tagħna hija ħidma sfiqa oħra ta’ dan il-Gvern. Il-proġett ta’ ‘Shore-to-Ship’ wassal biex il-port Malti jsir wieħed mill-ftit fl-Ewropa mgħammar b’din is-sistema. Dan huwa investiment dirett fis-saħħa ta’ dawk li jgħixu viċin il-portijiet, ’il fuq minn 17,000 familja li qed igawdu minn arja aktar nadifa u jnaqqas it-tniġġis tal-istorbju fil-Belt Kapitali u ż-żoni tal-madwar. L-investiment fl-ambjent huwa investiment fil-komunità. Kull ġnien, kull vjal, kull biċċa art li tinbidel f’żona ħadra hija valur miżjud għalina lkoll. Dawn mhumiex biss proġetti, iżda ħidma tanġibbli li qed tħalli differenza fil-ħajja ta’ kull wieħed u waħda minna. Dan huwa Gvern li jwettaq. Ambjent aħjar huwa investiment fil-futur tal-komunitajiet tagħna.
