Il-Kap tal-Oppożizzjoni fost il-problemi kollha li ħolqulu dawk li wara li poġġewh fil-kariga, ħakmuh taħt idejhom, għandu problema ewlenija, dik ta’ kredibbiltà.
Gvern Laburista mmexxi mill-Prim Ministru Robert Abela affaċċja l-akbar sfidi internazzjonali u kien dejjem fuq in-naħa tal-familji u n-negozji billi refa’ l-piż hu u mhux xeħtu fuq in-nies. Għall-kontra tal-Oppożizzjoni li meta kellha l-poter b’GonziPN, għabbiet lin-nies bil-piżijiet.
Illum, GonziPN 2, l-Oppożizzjoni ta’ Bernard Grech, tgħidilna biex naqtgħu s-sussidju fuq l-enerġija u titkellem kontra inizjattivi li bihom ilqajna għall-isfidi reali tan-nies, bħalma hi l-inflazzjoni. Tassew Oppożizzjoni li tibqa’ ffisata fuq l-awsterità.
Huwa ta’ għajb li l-Kap tal-Oppożizzjoni mhux kapaċi jintrefa’ ’l fuq mill-partiġġjaniżmu mqar għall-okkażjoni waħda favur l-interess tal-familji u n-negozji, u jieqaf jippolitiċizza sfidi kurrenti. Quddiem sfidi internazzjonali, in-nies taf min dejjem kien magħha u min talabha tagħmel is-sagrifiċċji għax ġej l-issikkar taċ-ċinturin.
Gvern Laburista se jibqa’ fuq in-naħa tan-nies u jinvesti fihom kif għamel bl-akbar Budget fl-istorja li fih ta investiment soċjali qawwi fil-familji u l-ħaddiema.
