Fetħet il-konsultazzjoni pubblika dwar il-Pjan għar-Riġenerazzjoni ta’ Birżebbuġa. Kien fil-baġit għal din is-sena li l-Gvern ħabbar li se jitfassal dan il-pjan għal-lokalità li tul is-snin kibret kemm fir-residenti u kemm fl-isfidi.
Iżda, minkejja dan ftit li xejn ingħatat attenzjoni. Anke jekk fl-istess ħin li l-post kiber kien qed jitgħabba b’piżijiet tal-effetti kkawżati mill-mod kif tħalla jiġi żviluppat il-Port Ħieles fost oħrajn.
L-iskop tal-Pjan ta’ Riġenerazzjoni ta’ Birżebbuġa huwa dak li jitfassal pjan sħiħ li għandu jibda billi jittieħed rendikont ta’ dak li huwa meħtieġ għal din il-lokalità filwaqt li jkunu ppjanati inizjattivi u proġetti biex f’Birżebbuġa jitwettqu proġetti ta’ tisbiħ, jittieħdu inizjattivi biex joffru servizzi ġodda u jitwettqu numru ta’ inizjattivi b’risq ir-residenti u l-komunità tal-lokalità.
Il-lokalità ta’ Birżebbuġa għandha diversi ħtiġijiet infrastrutturali kemm fiż-żoni residenzjali kif ukoll fiż-żoni viċin il-baħar.
Il-pjan se jkun qed isir wara li l-Gvern diġà wettaq żewġ proġetti importanti għall-benefiċċju ta’ dan il-lokal, il-pitch tal-futbol kif ukoll il-pixxina. Żewġ proġetti li bagħtu sinjal ċar li l-Gvern huwa kommess li jwettaq bidla f’din il-lokalità.
Wieħed irid isemmi wkoll il-pjani tal-Gvern li t-tankijiet ta’ ħażna ta’ fjuwil fil-qalba tar-residenti ta’ Birżebbuġa se jkunu qed jiżżarmaw u jitneħħew, kif ukoll l-impjant li fih kienu jimtlew iċ-ċilindri tal-gass li wkoll se jiżżarma.
Il-proċess li se jwassal għall-Pjan ta’ Riġenerazzjoni huwa inizjattiva interministerjali bejn il-Ministeru għat-Trasport u l-Infrastruttura u l-Ministeru fi ħdan l-Uffiċċju tal-Prim Ministru.
Fil-preżent inbeda proċess ta’ konsultazzjoni permezz ta’ laqgħat mal-għaqdiet volontarji ta’ Birżebbuġa li għandhom jiġu segwiti b’laqgħat mal-komunità kummerċjali u anke mar-residenti.
Il-proċess ta’ konsultazzjoni ġie fdat f’idejn il-Korporazzjoni għar-Riġenerazzjoni tal-Port il-Kbir li llum għandha esperjenza mill-aktar vasta fil-qasam ta’ proġetti ta’ rigenerazzjoni.
L-esperjenza li din il-Korporazzjoni kisbet u qed tikseb fi proġetti ta’ riġenerazzjoni li qed jitwettqu fil-Belt Valletta hija esperjenza li għandha tintuża f’inizjattivi ta’ riġenerazzjoni li hemm il-ħtieġa li titwettaq f’żoni u reġjuni oħra f’pajjiżna.
F’kumment li ta Stefan Zrinzo Azzopardi, Chairman tal-Korporazzjoni għar-Riġenerazzjoni tal-Port il-Kbir qal li “dan il-proċess ta’ riġenerazzjoni f’Birżebbuġa jeħtieġ li jkun proċess li jinvolvi aktar lin-nies u ma jkunx biss proċess ta’ riġenerazzjoni f’sens ta’ infrastruttura biss. Jeħtieg li jkun proċess li jwassal biex il-ħtiġijiet kollha tal-lokal jiġu indirizzati. Irid ikun pjan ta’ riġenerazzjoni maħsub għan-nies.”
Fil-fatt il-proċess ta’ riġenerazzjoni se jinkludi wkoll diversi aspetti biex il-Gvern ikollu viżjoni ċara dwar dawk l-inizjattivi li jeħtieġ li jitwettqu fiż-żmien li ġej biex anke jitjiebu s-servizzi pubbliċi li jkunu offruti f’din il-lokalità.
Projects Plus min-naħa tal-Ministeru fi ħdan l-Uffiċċju tal-Prim Ministru se tkun qed tieħu ħsieb numru ta’ proġetti li se jkunu ta’ benefiċċju kbir għal dan il-lokal. Dawn il-proġetti se jkomplu mal-kullana ta’ proġetti li diġà qegħdin jitwettqu f’Marsaxlokk.
Wieħed jista’ jgħid tiegħu fuq is-sit socialdialogue.gov.mt.
