Il-Prim Ministru Joseph Muscat qal li mill-istħarriġ tal-Eurobarometer ippubblikat iktar kmieni din il-ġimgħa l-iktar li huwa importanti hu li n-nies iħossuhom sejrin tajjeb. Mistoqsi dwar il-fatt li l-gvern li jmexxi hu huwa l-iktar gvern fdat fil-pajjiżi kollha tal-Unjoni Ewropea l-Prim Ministru qal: “Il-piż jiżdied mhux jonqos. Għax in-nies ikunu qed juruk iktar fiduċja.”
Kien hawn li tkellem fuq dawk li huma l-iktar tliet figuri importanti.
“L-iktar importanti li għandek 95% tan-nies li jgħidu li l-ekonomija sejra ‘il quddiem. 94% tan-nies jgħidu li l-impjiegi sejrin tajjeb… importanti li 92% qed jgħidu li l-qagħda finanzjarja tagħhom hija tajba,” qal Joseph Muscat li fisser kif filwaqt li wieħed jibqa’ jaħdem biex in-nies jibqgħu jħossuhom aħjar dawn huma tliet figuri importanti.
Il-gvern għandu x’jinvesti fin-nies għax fost oħrajn naqas id-dejn kif reġa’ kien ikkonfermat din il-ġimgħa.
Spjega kif meta jonqos id-dejn il-gvern jonfoq inqas fuq imgħaxijiet u għalhekk jista’ jonfoqhom fuq affarijiet oħra. “Nonfquhom fil-pensjonijiet, fit-trasport għat-tfal, fiċ-child care b’xejn u f’elf ħaġa oħra,” qal il-Prim Ministru li esprima s-sodisfazzjon għal dak li l-anzjani jgħidulu dwar iż-żieda fil-pensjonijiet sena wara oħra wara 25 sena li ma żdidietx il-pensjoni. Joseph Muscat qal ukoll li dan jsita’ jsir għax hawn iktar nies attivi fis-suq tax-xogħol. “Il-ġid li noħolqu qed inferxuh ma’ iktar nies,” kompla l-Prim Ministru li tkellem ukoll kif is-suċċess qed jinħass f’Għawdex ukoll.
“Din il-ġimgħa kienet ġimgħa sabiħa mmens għax f’Għawdex inawgurajna ċ-ċentru tal-anatomija. Ċentru ta’ livell mondjali fejn studenti jkunu qed jitgħallmu dwar il-ġisem tal-bniedem,” qal il-Prim Ministru.
“Hija xi ħaġa affaxinanti x’ħin rajt il-laboratorju li nbena minn Steward biex jintuża minn Barts,” kompla Joseph Muscat li spjega kif studenti minn postijiet differenti, fosthom l-Ingilterra, qed jistudjaw f’Għawdex. “Immaġina studenti Ingliżi jgħażlu li jistudjaw ma università Ingliża f’Malta,” spjega l-Prim Ministru.
“Dawk li kienu jgħidu li din mhux se seħħ illum qed jindunaw li kienu żbaljati,” fakkar il-Prim Ministru li ħabbar ukoll kif ix-xogħol infrastrutturali miexi tajjeb ħafna fejn anke l-binja tal-iskola medika issa hija kważi lesta minn barra. “Għawdex se ngħamlu ċentru internazzjonali ta’ tagħlim imma wkoll ta’ turiżmu mediku,” tenna l-Prim Ministru li fakkar kif din il-ġimgħa ħarġet statistika li turi li l-ekonomija ta’ Għawdex kibret iktar minn ta’ Malta.
“Li rridu naraw hu li t-tkabbir isir b’mod sostenibbli. U meta naraw li dan it-tkabbir huwa bbażat fuq l-ekonomija u s-saħħa hu sostenibbli,” qal Joseph Muscat.
