In-nefqa skond dak imħabbar fIl-Budget għas-sena d-dieħla fil-qasam tas-Saħħa hija waħda rekord u tabeż il-biljun ewro.
Ħabbar dan id-Deputat Prim Ministru u Ministru għas-Saħħa Chris Fearne waqt konferenza tal-aħbarijiet bit-tema Malta Ċertezza u Stabbiltà.
“Il-Budget tas-saħħa għas-sena li ġejja huwa budget rekord. Dan huwa ta’ aktar minn biljun ewro. Huwa ta’ biljun u sitt miljun ewro. €930 miljun ewro rikorrenti u €75 miljun li huma kapital. Dan huwa rekord assolut mindu bdew isiru l-Budgets f’dan il-pajjiż.”
F’din il-konferenza tal-aħbarijiet, id-Deputat Prim Ministru ta rendikont ta’ dak kollu pjanat għall-2023 skond dak imħabbar fil-Budget għas-sena d-dieħla ftit tal-jiem ilu u lil hinn minn hekk.
“Għas-sena li ġejja għandna programm vast u li huwa ambiżżjuz filwaqt li aħna kunfidenti li bħas-snin li għaddew ħa nwettquh fil-milja tiegħu wkoll,” sostna d-Deputat Prim Ministru hekk kif tenna li dak imħabbar mill-Budget għall-2023 huwa biss parti minn dak pjanat għal dan il-qasam.
Fost, elenku sħiħ tal-affarijiet li ser ikunu qed isiru, id-Deputat Prim Ministru aċċenna għal proġetti fil-qasam tal-kura primarja li wasslu biex fl-aħħar xhur infetħu 24 berġa jew ċentri komunitarji.
Intant fit-tnax-il xahar li ġejjin se jinfetħu oħrajn fis-Siġġiewi, fil-Qala Għawdex, Pembroke, Ħad-Dingli, San Pawl il-Baħar u oħrajn. Dan filwaqt li bħalissa għaddej xogħol estensiv fiċ-Ċentru tas-Saħħa ta’ Birkirkara biex fi Frar li ġej dan jinfetaħ. Intant fl-istess perjodu se jkun qed jitlesta’ wkoll ix-xogħol fiċ-ċentru tas-Saħħa ta’ Ħal Qormi.
F’Għawdex, f’Settembru li ġej se jkun qed jinfetaħ ċentru kbir tas-saħħa fir-Rabat ukoll.
Id-Deputat Prim Ministru aċċenna fost oħrajn għall-Health Workforce Strategy li ħabbar il-Gvern ftit tal-jiem ilu wkoll u li se tippermetti ppjanar importanti għall-ħtiġijiet tal-qasam u l-impjegati biex jingħata l-aħjar servizz.
Dan għat-8,920 ruħ jaħdmu fid-Dipartiment tas-saħħa f’pajjiżna li sena wara l-oħra jagħtu r-riżultati ta’ eċċellenza fis-sistema tas-saħħa ta’ pajjiżna.
“Aktar tard din is-sena se nvaraw strateġija nazzjonali dwar il-kura paljattiva,” tenna d-Deputat Prim Ministru hekk kif sostna li din hija kura speċjalizzati u li huwa kruċjali li s-sistema tas-saħħa tkun preparata għaliha.
Fost oħrajn ġiet rimarkata wkoll strateġija dwar is-saħħa sesswali hekk kif bħalissa għaddej survej nazzjonali li se jkun qed jieħu l-veduti ta’ eluf ta’ persuni biex tinġabar informazzjoni dwar prattiċi, fehmiet u attitudnijiet li għandhom x’jaqsmu mas-sesswalità. Hawn id-Deputat Prim Ministru tenna li fit-tieni kwart tas-sena li ġejja din l-istrateġija mistennija tittellaq għal konsultazzjoni pubblika.
Mis sena li ġejja d-Deputat Prim Ministru ħabbar ukoll li se jkun qed jingħata wkoll b’mod kumplimentarju ma’ dak offrut fl-Isptar Mater Dei, servizz tal-GU Clinic. Dan permezz ta’ 3 tobba mħarrġin fiċ-Ċentru Komunitarji f’Marsaxlokk, il-Mellieġa, fl-Għarb Għawdex u fiċ-Ċentru Vincent Moran f’Raħal Ġdid. Dwar dan tal-aħħar, id-Deputat Prim Ministru sostna li dan se jkun qed jinfetaħ f’nofs is-sena sabiex jibdew jingħataw l-ewwel servizzi.
