Sal-lum, il-Ministeru għas-Solidarjetà u l-Ġustizzja Soċjali, il-Familja u d-Drittijiet tat-Tfal, wettaq jew qed iwettaq ħamsa u disgħin fil-mija tal-proposti fil-Manifest Elettorali li jaqgħu taħt is-settur soċjali.
F’konferenza tal-aħbarijiet ġie spjegat kif twettqu kompletament erbgħa u għoxrin minn erbgħa u tletin proposta. Tmienja oħra se jitwettqu sa Diċembru li ġej u tnejn oħra qed isir xogħol fuqhom u jiddependu fuq il-fondi li jingħataw fil-Budget li ġej.
Il-Ministru responsabbli mill-qasam soċjali, Michael Falzon qal li l-ħidma fl-aħħar erba’ snin tixhed l-impenn soċjali t’amministrazzjoni Laburista msejsa fuq il-prinċipju li ttejjeb il-ġustizzja soċjali.
Semma l-pensjonanti u fakkar kif wara kwart ta’ seklu ta’ pensjoni ffriżata, fit-tmien snin li ilu jamministra l-pajjiż, Gvern Laburista żied il-pensjonijiet sitt darbiet. Qal li l-mira kienet li tiżdied il-pensjoni bi tmien ewro fil-ġimgħa, u din il-mira mhux biss intlaħqet imma saħansitra nqabżet. Wiegħed li fil-Budget li ġej, din is-sezzjoni tal-poplu se tibqa’ tiġi mgħejjuna mill-Gvern.
Dwar il-miżura tat-tapering tal-benefiċċji soċjali, il-Ministru qal li din wasslet biex wieħed u tmenin fil-mija ta’ dawk li daħlu fis-sistema baqgħu fid-dinja tax-xogħol. Il-maġġoranza, sitta u sebgħin fil-mija, kienu nisa.
Irrimarka wkoll li dawk fuq il-benefiċċju tal-qgħad naqsu b’disgħin fil-mija taħt din l-amministrazzjoni. Filwaqt li fl-elfejn u tlettax kien hawn aktar minn erbat elef persuna fuq il-benefiċċju tal-qgħad, f’Awwissu li għadda, dan in-numru niżel għal erba’ mija u ħamsa u tletin.
Il-Ministru qal li kien hemm tliet rekords assoluti minn kemm ilha tinżamm l-istatistika: “Għandek tliet rekords assoluti. Illum pajjiżna għandu l-inqas numru ta’ nies qatt li kellu jiddependu fuq dak li huwa l-benefiċċju tad-diżimpjieg. Hemmhekk kellna tnaqqis ta’ disgħin fil-mija. Għandek imbagħad rekord assolut ieħor li pajjiżna qatt ma kellu daqshekk nies fid-dinja tax-xogħol u pożittiv immens ukoll li n-numru ta’ nies jiddependu fuq is-servizzi soċjali, minn ħmistax-il elf, mija u iktar, illum qed nitkellmu fuq madwar sitt elef. Tnaqqis ieħor ta’ aktar minn ħamsin fil-mija.”
Semma wkoll miżuri bħaċ-childcare b’xejn, il-klabb 3-16 u ż-żieda fiċ-children’s allowance, li għenu partikolarment lin-nisa u ommijiet fid-dinja tax-xogħol.
Il-Ministru Michael Falzon elenka anki l-għajnuna li ngħatat lil tfal vulnerabbli u familji li xtaqu jadottaw, u qal li anki jekk hawn, in-numri ta’ nies li gawdew huma żgħar, l-għajnuna għalihom xorta tiswa mitqlu deheb.
Huwa sostna: “L-impenn huwa wieħed ċar. L-ewwel nett, aħna Partit, Gvern, amministrazzjoni li verament tinvesti fin-nies u għalina n-numri biss mhumiex biżżejjed. Ma nistgħux, kif forsi kien jagħmel ħaddieħor, għax dawk qegħdin ftit taffordja taqbiżhom. Le. Kull min hu vulnerabbli, kull min għandu bżonn l-għajnuna, irridu nkunu hemm biex nagħtuhielu.”
Il-Ministru temm jgħid li dawn huma l-aqwa riżultati politiċi li qatt jista’ jkollok; li tagħmel differenza fil-ħajja tan-nies.
