Tilef ħajtu wieħed mill-imħuħ wara l-karattru Spider-Man, Steve Ditko fl-età ta’ 90 sena.
Hu nstab mitluf minn sensih fl-appartament tiegħu f’Manhattan fid-29 ta’ Ġunju fejn ġie ċċertifikat mejjet minn paramediċi fuq il-post.
Huma bosta persuni li huma fanatiċi tal-komiks urew is-sogħba tagħhom għat-telfa ta’ Ditko.
Ditko sar famuż għax-xogħol li għamel ma’ Marvel Comics fil-bidu tas-snin 60, fejn ħadem id f’id mal-Kap Eżekuttiv Stan Lee dwar ideat ġodda fosthom il-karattri Spider-Man u Doctor Strange.
Lee ħoloq l-idea ta’ ġuvni li jkollu abiltajiet ta’ brimba, iżda kien Ditko li ta l-ħajja lil dan il-karattru b’kustum mill-isbaħ u l-wiċċ li nafu llum.
Ditko telaq minn mal-kumpanija Marvel Comics fl-1966 wara li allegatament kellu xi jgħid ma’ Lee u mar jaħdem mal-kumpanija DC Comics fejn ħoloq il-karattru The Creeper.
