Tħabbret il-mewt tal-ex Membru Parlamentari Laburista, il-Professur Anthony Zammit li ħalla din id-dinja fl-età ta’ sebgħa u sittin sena, wara battalja mal-marda tal-kanċer.
Il-Professur Zammit, li ġie elett fil-Parlament Malti fl-elfejn u tmienja, ħalla impatt qawwi fil-qasam tal-mediċina, b’mod speċjali fil-qasam tal-kirurġija. Kien hu wkoll dak li opera lill-eks Prim Ministru Laburista, Alfred Sant f’Diċembru tal-elfejn u sebgħa, meta dan tal-aħħar kien marid serjament.
Imwieled f’Tas-Sliema fis-sitta u għoxrin ta’ Ġunju tal-elf disa’ mija u ħamsin, hu attenda għadd ta’ skejjel, sakemm ta’ tmintax-il sena daħal l-Università ta’ Malta biex jistudja l-Mediċina u l-Kirurġija.
Wara li gradwa, rħielha lejn il-Ġermanja, fejn hemm baqa’ jistudja l-mediċina għal għadd ta’ snin, waqt li ggradwa wkoll fil-Ġermaniż. Tant li spiċċa jgħallem fl-università ta’ Dusseldorf. Illum-il ġurnata, ismu hu rikonoxxut f’għadd ta’ kitbiet li kiteb fi żmienu fil-Ġermanja.
Fl-elf disa’ mijja, ħamsa u tmenin irritorna lura lejn pajjiżna fejn beda jservi bħala Konsulent Kirurgu fl-Isptar Ġenerali ta’ St Luke’s u wkoll jgħallem il-Kirurġija fl-Universita’ ta’ Malta. Wara li fit-tieni kandidatura tiegħu fl-elezzjoni tal-elfejn u tmienja Zammit ġie elett bħala membru fil-parlament Malti, hu kien inkarigat l-ewwel mill-qasan tas-saħħa flimkien ma’ Dr. Michael Falzon, mbagħad mill-Anzjani u s-Soċjetà Interġenerazzjonali.
Hu baqa’ jaħdem bħala kirurgu sakemm leħaq l-età tal-irtirar fl-elfejn u ħdax, iżda dak iż-żmien, taħt amministrazzjoni Nazzjonalista, hu ma tħalliex ikompli jaħdem u l-kuntratt ma ġġeddidlux. Aktar minn hekk iżda l-professur Żammit jibqa mfakkar għall-qalb tad-deheb li dejjem wera mal-pubbliku Malti, li jistgħu jixduha l-mijiet jekk mhux eluf ta’ nies li ġew bżonn l-għajnuna tiegħu tul ħajtu.
Il-grupp ONE isellem u jirringrazja lil Anthony Zammit, filwaqt li jesprimi l-kondoljanzi mal-familja tiegħu.