Il-Ministeru għall-Agrikoltura, is-Sajd u d-Drittijiet tal-Annimali nieda numru ta’ miżuri preventivi biex jimpedixxi d-dħul tal-marda tal-ilsien u d-dwiefer f’Malta. Il-Ministru Anton Refalo spjega li l-miżuri li qed jintroduċi pajjiżna jiffokaw primarjament fuq il-prevenzjoni u l-bijosigurtà.
Dawn il-miżuri qed jittieħdu wara li feġġew każijiet ta’ din il-marda f’pajjiżi tal-Ewropa Ċentrali, fosthom il-Ġermanja, l-Ungerija u s-Slovakkja, okkorrenzi li f’diversi każijiet huma l-ewwel li seħħu f’aktar minn 50 sena. Għalkemm il-marda ma twassalx għall-mewt tal-annimali infettati u lanqas ma tirrappreżenta riskju għall-bniedem, l-impatt ekonomiku jista’ jkun sinifikanti, minħabba t-tnaqqis fil-produzzjoni ta’ laħam u ħalib.
Huwa importanti li jiġi innotat li l-marda ma taffettwax lill-bniedem u ma tiġix trażmessa la permezz ta’ kuntatt dirett ma’ annimali ħajjin u lanqas permezz tal-konsum tal-laħam.
Il-Ministru Refalo tenna li peress li programm ta’ tilqim mhux irrakkomandat minħabba diversi raġunijiet, fosthom li l-virus jevolvi u jinbidel malajr, iddaħħlu numru ta’ miżuri fosthom:
• Restrizzjonijiet fuq l-importazzjoni u l-moviment ta’ ruminanti (fosthom baqar, mogħoż u nagħaġ) u ħnieżer, li tinkludi perjodu mandatorju ta’ kwarantina.
• Vetturi li jkunu għaddew minn żoni milquta mhux se jkunu jistgħu jidħlu f’pajjiżna sakemm dawn ir-regoli jkunu għadhom fis-seħħ. Anke persuni li għaddew minn dawn iż-żoni mhux se jkunu jistgħu jidħlu u, jew iżuru rziezet jew kwalunkwe post ieħor fejn jinżammu ruminanti jew ħnieżer.
• Se jkun hemm miżuri ta’ kontroll fuq ċaqliq temporanju ta’ dawn it-tip ta’ annimali f’Malta u Għawdex, fejn kull ċaqliq irid ikun awtorizzat mid-Direttur għar-Regolamentazzjoni Veterinarja.
• Restrizzjonijiet fuq esibizzjonijiet ta’ ruminanti u majjali f’attivitajiet pubbliċi.
• Se titnieda kampanja għall-pubbliku biex il-komunità agrikola kif ukoll il-pubbliku jkun konxju tal-miżuri li rridu nirrispettaw biex din il-marda ma tidħolx f’ pajjiżna.
Se tkun ir-responsabbiltà tad-Direttur għar-Regolamentazzjoni Veterinarja li jara li dawn ir-regoli restrittivi jkunu mħarsa kif ukoll li jieħu l-passi kollha meħtieġa inkluż li jissekwestra, iżomm jew jeqred dawk l-annimali li jkunu kissru l-miżuri.
Il-Ministru Anton Refalo sostan li f’pajjiżna għandna 431 razzett li jrabbu l-baqar, il-ħnieżer, ruminanti u iktar minn 65,000 ta’ dawn it-tip ta’ annimali, fejn huwa għalhekk il-periklu li l-marda tixtered malajr hu ikbar. Qal li għaldaqstant se jittieħdu l-miżuri kollha possibbli biex din il-marda ma tersaqx lejn pajjiżna, fejn anke jappella lill-operaturi kollha fis-settur agroindustrijali kif ukoll lill-pubbliku biex jikkoperaw u jirrispettaw r-regoli li qed jiddaħħlu, ħalli din il-marda tinżam ’l bogħod minn xtutna.
