Ġiet varata politika nazzjonali rigward l-infrastruttura li permezz tagħha jiġu ċċarġjati l-vetturi elettriċi; politika li tinkludi l-ftuħ għas-settur privat sabiex jinvolvi ruħu f’din in-niċċa ekonomika ġdida.
F’konferenza tal-aħbarijiet, it-Tnejn filgħodu ntqal li b’hekk, issa, investituri privati jistgħu japplikaw biex ikunu operaturi taċ-charging pillars mar-Regolatur għas-Servizzi tal-Enerġija u l-Ilma, r-REWS.
Il-liċenzja għall-operaturi se tkun tiswa €500 u se tibqa’ valida għal 12-il sena. L-operaturi għandhom iħallsu wkoll miżata ta’ €75 kull 3 snin għal kull charging point.
Il-Kap Eżekuttiv tar-REWS, Marjohn Abela, qal li din l-inizjattiva se tgħin biex tagħmel tajjeb biex tiġi pprovduta infrastruttura iktar estensiva u jkun hawn aktar servizzi sabiex jiġu ċċarġjati vetturi li jaħdmu bl-elettriku, li kull ma jmur dejjem qed ikomplu jiżdiedu, anki b’riżultat tal-inċentivi li offra l-Gvern favur ix-xiri tagħhom.
ONE News tkellem mal-Inġinier Abigail Cutajar, li fi preżentazzjoni dettaljata spjegat uħud mid-dettalji li tinvolvi din il-politika nazzjonali; politika li se tikkontribwixxi biex tintlaħaq il-mira li, sal-2030, l-emissjonijiet b’effett ta’ serra jitnaqqsu bi 19 fil-mija.
L-Inġinier Cutajar qalet li diġà sar assessjar strateġiku ta’ postijiet minn fejn jtista’ tinbeda l-implimentazzjoni ta’ dawn iċ-charging pillars. Qalet ukoll li biex jiċċarġja l-vettura tiegħu l-pubbliku se jkun qed iħallas kemm għall-elettriku kif ukoll għal premium li se jkun qed jistabbilixxi min implimenta ċ-charging pillar.
It-tariffa rigward l-elettriku se tkun regolata mir-REWS.
Qalet, “Qed invaraw pjattaforma ta’ assistenza mal-Business First u l-Malta Enterprise biex dak li jkun, jekk ikun jixtieq jidħol fis-settur, ikollu pjattaforma vera faċli fejn wieħed ikun jista’ jirrikorri.”
Minn naħa tagħha, il-Ministru responsabbli mill-enerġija, Miriam Dalli, sostniet li biex il-Gvern jgħin biex jiżdiedu aktar vetturi mal-10,000 vettura elettrika li diġà għandu pajjiżna, irid jistabbilixxi politika li tinċentiva dan.
Hija saħqet dwar l-importanza tal-involviment tas-settur privat fl-implimentazzjoni ta’ sistema aktar b’saħħitha ta’ charging pillars.
Semmiet ukoll l-interess li wera l-istess settur biex pajjiżna jkun attrezzat aħjar għall-qalba minn vetturi li jaħdmu bil-petrol u d-diżil għal dawk li jaħdmu bl-elettriku.
Qalet, “Nemmen li jekk il-Gvern u s-settur privat jaħdmu id f’id, proprju f’dan il-qasam, naslu f’punt fejn in-nies inkunu qed nagħtuhom aktar points ta’ infrastruttura ta’ public charging għall-karozzi; postijiet li jkunu aċċessibbli għalihom, u anke bi skemi u bi prezzijiet li jkunu affordabbli għalihom.”
Id-dokument dwar din il-politika nazzjonali jista’ jiġi aċċessat mis-sit tal-Ministeru għall-Ambjent, l-Enerġija u l-Intrapriża.
