Il-Ministru għal Għawdex Justyne Cauana nediet The Leone Grand Christmas Show, varjetà għall-familja kollha li se ssir nhar il-Ħadd, 23 ta’ Diċembru 2018, fit-teatru tal-Opri Aurora.
Dr Caruana qalet li din is-sena l-Ministeru investa bis-sħiħ biex ikabbar u jifrex aktar l-attivitajiet li jiġu organizzati f’Għawdex taħt il-kappa ‘Milied f’Għawdex’. Il-Ministru Caruana fakkret kif din is-sena sar sforz akbar biex f’kull raħal f’Għawdex ssir xi attività b’rabta ma’ dawn iż-żminijiet ta’ ferħ u ċelebrazzjonijiet. “Dan wassal biex ċerti rħula u għaqdiet ressqu proposti innovattivi ġew mgħaqqda mal-attivitajiet li issa huma stabbiliti. Dawn ħolqu palat li żgur għoġob lil kull min attenda u ipparteċipa fihom,” qalet il-Ministru għal Għawdex.
Il-Ministru Caruana ferħet lid-diriġenti tat-Teatru Aurora li ħadu ħsieb biex jorganizzaw spettaklu li jallegra lill-udjenza kollha permezz ta’ talent lokali flimkien mal-banda Ċittadina Leone. Il-Ministru rrimarkat kif attivitajiet bħal dawn ikomplu jipromwovu l-kultura f’Għawdex kif ukoll jagħtu l-opportunità biex aktar żgħażagħ jesponu t-talenti tagħhom.
Dr Michael Caruana, President tas-Soċjetà Filarmonika Leone qal li din l-attività tikkombina l-elementi kollha fi ħdan is-soċjetà Leone. Huwa rringrazzja lill-Ministeru għal Għawdex għas-sapport kontinwu, mhux biss biex din l-attività tkun tista’ ssir, imma tas-sostenn matul is-sena kollha.
The Leone Grand Christmas Show se ssir nhar il-Ħadd, 23 ta’ Diċembru 2018 u tibda fl-4.00pm.
