Jeremy Borg ta’ wieħed u għoxrin sena nżamm arrestat wara li wieġeb mhux ħati li kiser kundizzjonijiet mogħtija mill-Qorti.
Fil-Qorti, id-Difiża kkontestat l-arrest tal-imputat, hekk kif fost oħrajn stqarret li huwa ma ngħatax id-drittijiet tiegħu mal-mument li ġie arrestat.
Dwar dan , il-Qorti se tkun qed tiddeċiedi dwar l-validitá tal-arrest aktar tard fil-proċedura.
L-imputat ġie akkużat li kiser ordnijiet mill-Qorti fejn ingħata l-ħelsien mill-arrest b’rabta ma’ akkużi oħra, f’każ separat. Borg huwa wieħed mill-akkużati mixlija bil-ħtif ta’ Carlos Schembri, liema każ seħħ is-sena l-oħra.
Huwa kien akkużat ukoll bi traffikar ta’ kokaina fl-elfejn wieħed u għoxrin.
L-Ispettur Lydon Zammit xehed fil-Qorti li fil-karozza mal-imputat, kien hemm persuna, bl-isem ta’ Sean Grech, li wkoll kien qiegħed barra fil-10:50pm, ħin li suppost, iż-żewġ persuni kienu qiegħdin f’darhom.
L-Ispettur Zammit stqarr li meta l-Pulizija tkellmet maż-żewġ persuni, u meta ġew mistoqsija r-raġuni għala dawn kienu qed jiksru l-kundizzjonijiet tal-Qorti, dawn taw żewġ verżjonijiet differenti.
Id-Difiża talbet għall-ħelsien mill-arrest, liema talba ġiet oġġezzjonata mill-Prosekuzzjoni, hekk kif stqarret li Borg diġá ngħata l-ħelsien mill-arrest fuq it-tliet kawżi oħra, u għalhekk m’huwiex affidabbli.
Il-Qorti ċaħdet it-talba tal-ħelsien mill-arrest.
Hawn inqalgħet kommossjoni fl-awla, hekk kif huwa u ħiereġ, Borg beda jidgħi, u ġie ordnat jerġa’ jidħol.
Huwa nstab ħati ta’ disprezz fil-Qorti, u ingħata multa ta’ €1,000.
Il-Qorti ddiferiet din il-kawża għall-ħdax ta’ Jannar fis-siegħa u nofs.
