Il-kreditu ta’ taxxa għall-ġenituri ta’ tfal b’diżabilità se jiżdied minn €500 għal €750 fis-sena, biex jgħinhom fl-ispejjeż għal terapiji speċjalizzati, b’din il-miżura se tkun amministrata mill-Kummissjoni għad-Drittijiet ta’ Persuni b’Diżabilità, is-CRPD.
Dan il-fond ġie estiż ukoll għal ġenituri li ma jħallsux taxxa, minħabba li ma jaħdmux jew għax jinsabu fuq il-benefiċċji soċjali, bħala parti mill-Baġit għas-sena d-dieħla.
Dan tħabbar f’konferenza tal-aħbarijiet bit-tema ‘Pajjiż ta’ Kwalità’, fiċ-Ċentru Ħajja Indipendenti Sonia Tanti f’Ħal Far, li jitmexxa mill-aġenzija Sapport u fejn qed issir estensjoni tiegħu, b’investiment ta’ €700,000.
Dan il-proġett, li mistenni li jitlesta s-sena li ġejja, se jkun qiegħed joffri għadd ta’ benefiċċji u servizzi li jtejbu l-esperjenza ta’ dawk li jagħmlu użu miċ-ċentru.
Il-Ministru responsabbli Julia Farrugia fissret kif dan hu turija ta’ kemm dan il-Gvern qed ifittex li jkompli jgħolli l-kwalità fis-servizzi li joffri fis-settur tad-diżabilità.
“Dan l-investiment hu ftit anqas minn miljun ewro, se tkun binja li se jissaħħu mhux biss is-servizzi offruti biex il-persuni b’diżabilità jkollhom ħajja indipendenti, imma wkoll il-messaġġ b’saħħtu li jibgħat dan l-investiment li rridu nkomplu ninvestu fil-ġenerazzjonijiet preżenti, iżda wkoll futuri, hekk kif hu mistenni li jkun varat lejn l-aħħar tas-sena d-dieħla.”
Il-Ministru Julia Farrugia
Il-Kummissarju għad-Drittijiet ta’ Persuni b’Diżabilità, Rhoda Garland, stqarret kif iż-żieda fil-kreditu tat-taxxa għat-terapiji speċjalizzati hi għajnuna importanti.
“We are very pleased that this increase has gone through, as it will make a difference for disabled parents, not only those who pay taxes, but also for those who don’t work, so this is a very good news.”
Il-Kummissarju għad-Drittijiet ta’ Persuni b’Diżabilità Rhoda Garland
Min-naħa tiegħu, Oliver Scicluna, Kap Eżekuttiv tal-aġenzija Sapport, irrefera għax-xogħlijiet li għaddejjin fiċ-Ċentru Ħajja Indipendenti Sonia Tanti bħala investiment fl-aċċessibilità, b’faċilitajiet moderni minn fejn it-tim multi-dixxiplinarju ta’ terapisti u professjonisti jistgħu jwasslu diversi servizzi.
Fil-preżent, dawn is-servizzi speċjalizzati qed jingħataw minn binja fil-Qrendi sakemm jitlesta l-proġett f’Ħal Far.
