F’Misraħ ir-Repubblika, fil-Belt Valletta, is-Segretarju Parlamentari għall-Gvern Lokali Alison Zerafa Civelli ħabbret skemi għall-Kunsilli Lokali, għas-sena 2023.
L-għan ewlieni ta’ dawn l-iskemi huwa li l-kunsilli lokali jkollhom l-għodda neċessarja sabiex jindirizzaw il-bżonnijiet tal-lokalitajiet li jinbidlu maż-żminijiet u b’hekk ikomplu jtejbu l-kwalità tal-ħajja tar-residenti tagħhom.
Ġie mħabbar ukoll li għal din is-sena l-Kunsilli Reġjonali ngħataw ftit aktar minn żewġ miljun ewro biex fil-lokalitajiet jiġu introdotti latrini pubbliċi b’sistemi ta’ tindif awtomatiċi bl-użu tal-aħħar teknoloġija disponibbli. Ser tiġi mġedda wkoll l-iskema finanzjarja tar-Reġjun Kulturali għas-sena 2024, b’finanzjament ta’ €250,000.
L-impjiegi tal-ħaddiema taħt l-iskema Community Inclusive Employment Scheme ser jiġu mġedda b’finanzjament ta’ madwar €350,000.
Fost diversi sindki li kienu preżenti għal din il-konferenza tal-aħbarijiet, Max Zammit, is-Sindku ta’ Ta’ Xbiex wera l-apprezzament tiegħu għal dawn l-iskemi fuq l-aspett tat-tqassim tax-xogħol u dak finanzjarju.
Qal, “Il-fatt li dawn l-iskemi ġew imħabbra għas-sentejn li ġejjin ikollna lok aktar ta’ pjanar fil-mod kif inqassmu x-xogħol tagħna u kif ukoll mill-aspett finanzjarju għax skemi bħal dawn dejjem jgħinuna fi proġetti ġodda mingħajr ma naffetwaw l-allekazzjoni tagħna li sintendi minħabba l-bżonnijiet kollha li jkun hemm bżonn tal-lokal xi kultant tkun daqsxejn limitat u għalekk permezz ta’ dawn l-iskemi nistgħu nkmplu nimbuttaw numru ta’ inizzjattivi bl-għan li r-residenti tagħna jkunu aħjar.”
Minn naħa tagħha, is-Segretarju Parlamentari għall-Gvern Lokali Alison Zerafa Civelli spjegat li l-mira ‘l quddiem għandha tkun iffukata fuq mekkaniżmu ġdid għall-finanzjament tal-iskemi għall-Kunsilli Lokali.
Stqarret, “Gvern Laburista jemmen fil-ħidma kontinwa tal-kunsilli Lokali u għaldaqstant permezz ta’ dawn l-iskemi imħabbra l-Gvern se jkompli jgħin lill-Kunsilli Lokali jwettqu aktar proġetti” fil-qalba tal-lokalitajiet tagħna biex ikunu r-residenti Maltin u Għawdxin li jgawdu minn kwalità ta’ ħajja aħjar.
