Il-gvern nieda skema ġdida bil-għan li tinċentiva investituri privati sabiex jinvestu f’enerġija rinovabbli permezz ta’ proġetti li jiġġeneraw mhux inqas minn elf kilowatt.
F’konferenza tal-aħbarjiet ġie spjegat li dawn il-proġetti jistgħu jiġu installati f’barrieri, artijiet industrijali, bjut u parkeġġi fost l-oħrajn.
Intqal ukoll li din l-iskema għandha massimu ta’ 19-il megawatt.
Il-Ministru għall-Enerġija, l-Intrapriża, u l-Ambjent, Miriam Dalli, stqarret li l-bidla għall-enerġija rinnovabbli ma tistax issir mingħajr is-settur privat. Għalhekk, il-Gvern qed joffri din l-opportunità sabiex investituri jgħinu f’din il-bidla filwaqt li jkunu assigurati investimenti b’rati ideali għas-settur privat.
Hija fakkret kif il-mira tal-Unjoni Ewropea għall-ammont ta’ enerġija ġġenerata minn sorsi rinovabbli sal-2030 hija ta’ 11.5%, iżda din bħalissa hija aktar minn 12%.
Minkejja dan, stqarret li xorta waħda fadal xi jsir, hekk kif il-Gvern se jkompli jinċentiva l-bidla nadifa permezz ta’ investimenti simili.
Hija appellat lill-investituri sabiex jibbenefikaw minn din l-iskema, li se jkollha riżultati pożittivi għalihom, għall-ambjent u għall-poplu Malti.
Hija qalet, “B’din l-iskema li għamilna, jekk tittieħed kollha, jfisser li jkollok enerġija nadifa għal madwar sebat elef dar u nkunu qed innaqsu l-emissjonijiet tas-CO2 bi ħdax-il elf u ħames mitt tunnellata. Allura l-appell tiegħi lill-investituri huwa sabiex verament jidħlu għal dawn l-iskemi għaliex inkunu qed nagħmlu ġid lill-ambjent, però hemm ukoll aspett finanzjarju, għaliex ikollhom rate of return tajjeb fuq l-investiment tagħhom, u fl-istess ħin inkunu qed naċċertaw ukoll li nsaħħu l-awtonomija fejn tidħol produzzjoni tal-enerġija.”
Intant, il-Kap Eżekuttiv tar-Regolatur tas-Servizzi tal-Enerġija u l-Ilma, Marjohn Abela, spjega li r-Regolatur se jkun qed jinforma lil dawk interessati dwar il-proċess kollu tal-applikazzjoni.
Huwa spjega, “Din is-sejħa miftuħa wkoll għal sorsi oħra, pereżempju enerġija mir-riħ. Issa l-offerti għal din l-iskema se jiftħu fit-tmienja u għoxrin ta’ Mejju, fejn wieħed jista’ jitfa’ l-bid tiegħu. Meta ngħidu jitfa’ l-bid tiegħu, jiġifieri jitfa l-feed-in tariff, kemm hu lest jieħu feed-in tariff. Fit-tletin ta’ Mejju, imbagħad, jinfetħu l-bids li jkunu ntefgħu, bl-għażla ssir fuq l-irħas prezz tal-bid li tkun intefgħet.”
