Il-Liċenzjar tal-Bennej imur lura għexieren ta’ snin u kien proprju għalhekk li l-Gvern ra kif se jaġġorna din il-liċenzja sabiex tkun aktar konformi mal-industrija tal-lum il-ġurnata.
L-avviż Legali dwar il-Liċenzja tal-Bennej, issa se ikun qed jinqala’ mill-Kodiċi tal-Liġijiet tal-Pulizija u jiddaħal fil-qafas tal-Att li waqqfet I-Awtorità tal-Bini u I-Kostruzzjoni, il-BCA.
B’hekk, issa din l-awtorità se tieħu taħt il-kappa tagħha il-Liċenzjar tal-Bennejja.
Skont I-Att, l-Awtorità tal-Bini u I-Kostruzzjoni ġiet assenjata biex twettaq u tieħu post il-funzjonijiet tal-Bord tal-Bennejja, filwaqt li tingħata s-setgħa li toħrog liċenzji għal xoghol ta’ kwalità iprem fl-industrija tal-kostruzzioni.
Intant, f’konferenza tal-aħbarijiet ġie spjegat ukoll kif din il-liċenzja se tfisser pass ‘il quddiem lejn aktar infurzar u responsabilità.
Ġie spjegat kif din mhux biss tmur id f’id mal-liġi tal-liċenzjar tal-kuntratturi, iżda wkoll se ssaħħaħ il-liġi tal-liċenzjar tal-bennejja eżistenti.
Tħabbar ukoll li dawk bil-liċenzja, se jżommuha u se jkollhom ukoll numru ta’ korsijiet sabiex jaġġornaw ruħhom, ma’ din l-industrija li kulma jmur, dejjem tevolvi.
Dan minbarra t-twaqqif ta’ kumitat magħmul minn 5 membri – 2 minnhom li jridu jkunu periti.
Dwar dan tkellem aħjar il-Ministru għax-Xogħlijiet Pubbliċi u l-Ippjanar, Stefan Zrinzo Azzopardi.
Stqarr, “Il-liċenzja tal-bennejja hija waħda li ilha u kien hemm il-ħtieġa li tkun aktar rappreżentattiva għal-liġijiet tal-lum, apparti aġġornament leġiżlattiv kif se tkun qed tapplika u taħdem fid-dawl anke tal-liġi tal-kuntratturi.”
Il-Kap Eżekuttiv fi ħdan l-Awtorità tal-Bini u l-Kostruzzjoni spjega dawn it-tibdiliet aktar fid-dettall.
Qal, “Bħala tibdil ieħor, min għandu l-liċenzja se jibqa’ bil-liċenzja, min m’għandux liċenzja jkun hemm il-kumitat, li llum diġà hemm kumitat, imma kumitat li jifhem aktar kif f’dawn l-aħħar erbgħin sena inbidlu s-sistemi tal-bini u jagħtuha eżamijiet relatati.”
L-applikanti jridu jkunu għalqu t-tmintax-il sena.
Dawk kollha interessati jistgħu jaċċessaw portal ta’ konsultazzjoni pubblika fejn l-abbozz ta’ Avviż Legali fuq: www.konsultazzjoni.gov.mt filwaqt li s-sottomissjonijiet jistgħu jintbagħtu b’email fuq consultation.construction@gov.mt
