Il-preżentatur u kantant popolari Tony Camilleri f’għodwa sajfija kien ingħaqad f’kollegament telefoniku mal-Ħamrun, minn fejn Ray Azzopardi, l-ewwel Kap tal-Programmi tal-istazzjon, kien xandar b’mod dirett iċ-ċelebrazzjonijiet fil-festa ta’ San Gejtanu.
Dak iż-żmien, Super One Radio, kien beda jxandar bi prova minn sena qabel twaqqaf uffiċjalment fuq il-frekwenza ta’ tmienja u tmenin fl-FM, iżda fil-ħdax t’Awwissu tal-elf disa’ mija wieħed u disgħin, beda jxandar fuq il-frekwenza tnejn u disgħin punt sebgħa fuq l-FM, u mill-ewwel sploda fil-popolarità.
L-istorja kienet inkitbet u minn dakinhar, erbgħa u għoxrin siegħa kuljum, sebat ijiem fil-ġimgħa, kiber bħala l-aqwa stazzjon fil-Gżejjer Maltin, b’eluf li jsegwu regolarment.
Dan jixhdu wkoll l-istħarriġ tal-Awtorità tax-Xandir li kull sena jikkonfermah bħala l-aktar stazzjon tar-radju segwit f’pajjiżna.
Dwar dan tkellimna mal-Kap ta’ ONE Radio, Clint Bajada, li b’sodisfazzjon innota kif l-istazzjon hu l-aktar popolari u s-semmiegħa jdumu jsegwu dan l-istazzjon.
Qal, “Filwaqt li nħarsu lejn it-tnejn u tletin anniversarju ta’ ONE Radio b’nostalġija u bi kburija, kburin ukoll li fl-aħħar ġimgħat ksibna ċertifikat ieħor. ONE Radio, wara tnejn u tletin sena, kellu ċertifikat sabiħ bħala l-aktar stazzjon segwit mill-Maltin u l-Għawdxin.”
Tul is-snin, ONE Radio bena familja u komunità fost is-semmiegħa leali, filwaqt li laqa’ fi ħdanu u offra opportunità lil mijiet ta’ kontributuri, fejn serva għalihom tal-ewwel tarġa fid-dinja tax-xandir.
Iżda mhux biss, hekk kif f’dawn it-tnejn u tletin sena, ONE Radio, skeda wara skeda, ħejja għas-semmiegħa tiegħu programmi mill-aktar varjati, minn dawk mużikali, informattivi, politiċi u interattivi, b’xi ħaġa għall-gosti ta’ kulħadd.
Iżda biex jibqa’ b’saħħtu l-istazzjon ma jistax jehda fin-nostalġija.
Xhieda ħajja ta’ dan, fl-eqqel ta’ Awwissu, għaddejjin it-tħejjijiet għall-iskeda tal-ħarifa li ġejja.
Qal, “Inħarsu ’l quddiem wkoll għall-iskeda li ġejja, l-iskeda tal-ħarifa fejn ONE Radio se jkun qiegħed jippreżenta ħoss ġdid f’dak li għandu x’jaqsam ma’ aktar kontenut mużikali, aktar divertiment, filwaqt li nħarsu lejn dak li nħloqna għalih, li nagħtu l-informazzjoni, il-programmi ta’ ġrajjiet kurrenti u dak kollu li l-poplu Malti u Għawdxi jiddiskuti.”
Miż-żerriegħa tar-radju nibet stazzjon b’saħħtu fit-televiżjoni u b’sehem importanti f’oqsma oħrajn, inkluż online.
Għalhekk l-istazzjonijiet ONE jibqgħu jiġbdu l-appoġġ f’suq kompetittiv u li mhu faċli xejn.
Iżda ONE Radio mhuwiex biss il-preżentaturi, imma wkoll is-semmiegħa leali, li huma l-qalb tħabbat tal-istazzjon li beda fl-1991 biex jibqa’.
Bajada enfasizza li dan ir-radju se jkompli fuq dak li bena aktar minn tliet diċenji ilu. B’dan il-mod, jibqa’ jgħix il-wegħda fil-kliem tal-ewwel diska li ndaqqet fuqu, jiġifieri ‘Nothing’s Gonna Stop Us Now’ tal-grupp Amerikan Starship.
Awguri għal aktar snin ta’ suċċess lil ONE Radio.
