L-Erbgħa tat-Tniebri hija ġurnata speċjali fil-kalendarju liturġiku Nisrani li timmarka l-bidu ta’ perjodu ta’ riflessjoni u dlam spiritwali hekk kif il-Knisja Kattolika tibda tfakkar il-Passjoni u l-mewt ta’ Ġesù Kristu.
Din il-ġurnata kienet tispikka b’tifkiriet li kienu jsiru filgħaxija fil-knejjes, fejn kienet issir ġabra b’talb magħruf bħala notturrn, li jdur madwar it-tbatijiet ta’ Kristu ftit qabel il-mewt tiegħu.
Il-kelma Tniebri ġejja mill-kelma Taljana tenebre, li tfisser “dlamijiet”, u proprju dan hu s-sinifikat simboliku wara l-funzjoni. Fil-fatt, bħala parti mir-rit, kienu jixegħlu kandilabru b’xemgħat ta’ lewn kannella skur u jitfu xemgħa wara l-oħra waqt li jinqraw is-salmi.
Fil-Knisja tan-Naxxar, din it-tradizzjoni għadha teżisti sal-lum. Il-kandilabru tal-ħadid għadu jintuża u jitpoġġa ħdejn monument magħruf bħala “Barabbas”, element li jagħti tifsira aktar fonda lill-funzjoni.
Tradizzjonijiet oħrajn relatati mal-Erbgħa tat-Tniebri għadhom jiġu ċċelebrati f’lokalitajiet differenti.
Pereżempju, fil-Birgu ssir il-purċissjoni s-sewda li tinkludi relikwarju antik ħafna. Dawn iċ-ċelebrazzjonijiet kollha jservu biex iżommu ħaj ir-rabta bejn il-fidi u l-wirt reliġjuż tagħna.
Illum il-ġurnata, ftit huma dawk li għadhom jafu jew jipparteċipaw f’dawn l-użanzi. Madankollu, għal dawk li għandhom għal qalbhom dawn iż-żminijiet, l-Erbgħa tat-Tniebri tibqa’ tifkira ta’ mument profond u ta’ meditazzjoni fuq is-sagrifiċċju ta’ Kristu.
