Il-President tal-Kummissjoni Ewropea Ursula von der Leyen iddikjarat li l-Unjoni Ewropea għandha pjan b’saħħtu sabiex tirritalja kontra t-tariffi imposti mill-President Amerikan Donald Trump iżda tippreferi tinnegozja.
Dan hekk kif mil-lum jidħlu f’effett it-tariffi fuq prodotti mid-dinja kollha f’dik li Trump laqqam ‘Liberation Day’.
Waqt li indirizzat il-Parlament Ewropew it-Tlieta, von der Leyen qalet li s-setturi li jmiss li se jiffaċċjaw tariffi ogħla huma s-semi kondutturi, prodotti farmaċewtiċi u l-injam. Hija qalet li ma kinitx l-Ewropa li bdiet din il-konfrontazzjoni, u għalkemm mhux neċessarjament jixtiequ jirritaljaw hemm bżonn li jkun hemm pjan b’saħħtu lest sabiex ikun użat.
Wara li f’Marzu kienu tħabbru tariffi fuq il-ħadid u l-aluminium, il-kummissjoni kienet iddikjarat li se timplimenta kontro miżuri fuq €26 biljun ta’ prodotti Amerikani. Dawn kienu jinkludu li jerġgħu jidħlu fis-seħħ tariffi fuq $4.5 biljun ta’ prodotti mill-Istati Uniti bħal jeans u muturi Harley-Davidson li kienu ġew sospiżi matul il-presidenza ta’ Joe Biden. Dawn il-miżuri mistennija jkunu implimentati f’nofs April wara li l-Eżekuttiv tal-UE għażel li jipposponi d-data tal-1 t’April sabiex kollox ikun implimentat kif suppost bi qbil mas-27 stat membru.
Issa qed isiru konsultazzjonijiet fuq it-tieni sett ta’ tariffi li jammontaw għall-madwar €18-il biljun li jkopru l-ħadid, aluminium, tiġieġ, ċanga, ħut u lewż għalkemm qed issir pressjoni minn diversi pajjiżi Ewropej biex ikunu protetti interessi nazzjonali.
Skont it-trattat ta’ relazzjoni kummerċjali bejn l-Unjoni Ewropea u l-Istati Uniti li fl-2023 ammonta għal €1.6 triljun, l-Ewropa tesporta lejn l-Istati Uniti aktar milli timporta speċjalment fejn jidħlu karozzi, mediċini u prodotti farmaċewtiċi li jista’ jfisser li Trump għandu vantaġġ fin-negozjati.
