Fil-Port il-Kbir illum issir ir-Regatta ta’ Jum il-Ħelsien. Bħas-soltu se jkun hemm ħdax-il tiġrija: ħamsa ta’ kategorija A, ħamsa ta’ kategorija B u waħda għall-qaddiefa nisa. Il-klabbs parteċipanti huma: Bormla, Birgu, Isla, Kalkara, Marsa, Marsamxett, Birżebbuġa u Siġġiewi.
F’Kategorija A, it-taqtiegħa se terġa’ tkun bejn it-tliet ibliet tal-Kottonera: Bormla, Birgu u Isla. It-tliet klabbs jinsabu armati tajjeb u mistennija taqtiegħa ħarxa bejnithom. Friski mis-suċċess ta’ Settembru li għadda, Birgu jibdew bħala l-favoriti netti. Biss huma se jkollhom l-isfida ta’ Bormla (holders tax-shield tal-Ħelsien) u l-Isla (li tilfu x-shield tal-Vitorja għal żewġ punti biss).
Missielta wkoll se tkun Kategorija B fejn għal sena oħra ħafna klabbs iddeċiedew li jiffukaw fuqha. Bħas-soltu l-programm jibda bit-tiġrija għall-qaddiefa nisa, fejn hawnhekk se jkollna novita’ hekk kif iż-żewġ qaddiefa li f’dawn l-aħħar snin iddominaw din il-kategorija biddlu l-klabb u din is-sena se jaqdfu ma’ Marsamxett.
Ir-Regatta ta’ Jum il-Ħelsien tibda fis-13:00. Aktar qabel se jsir it-tlugħ tal-poloz tat-tiġrijiet kollha.
One Radio se jkun qed iwassal aġġornamenti mill-Port il-Kbir b’kollegamenti diretti mis-14:00 ‘il quddiem.
