It-Tnejn filgħodu kompla jinstema’ l-każ fil-konfront ta’ Dun Ġużepp Sultana ta’ erbgħa u tmenin sena u Dun Ġuzepp Cini ta’ wieħed u sebgħin sena li huma mixlija b’abbuż sesswali u stupru t’abbati.
Quddiem il-Qorti t’Għawdex ippreseduta mill-Maġistrat Monica Vella llum xehdu ħames persuni fil-konfront tal-qassisin fosthom anki l-Isqof t’Għawdex Monsinjur Anton Teuma.
Fil-Qorti l-Maġistrat rat kif tressqu biżżejjed provi biex iż-żewġ qassisin jitpoġġew taħt att t’akkuża.
Is-seduta bdiet għall-ħabta tal-għaxra u nofs kienet titratta l-każ ta’ Dun Ġużepp Sultana.
L-ewwel persuna li tela’ fuq il-pedana tax-xhieda kien Monsinjur Ewkarist Sultana, li bejn l-elf disa’ mija u tlieta u sebgħin u l-elfejn u erbgħa serva ta’ Arċipriet fil-Bażilika tax-Xagħra. Dun Karist qal li huwa għammed lill-vittma u tenna li ma jiftakarx jekk kienx abbati fi żmienu.
Hawnhekk huwa saħaq kif nhar ta’ Ħadd fil-quddiesa tal-kantata, jiġifieri dik tat-tmienja u nofs ta’ filgħodu, fis-sagristija tax-Xagħra kien ikun hemm madwar ħamsin persuna, inkluż abbatini, qassisin, ġenituri tal-abbatini u anke nies biex iqerru.
It-tieni persuna li xehed kien l-Kap tas-Safeguarding Commission, tal-Knisja, Andrew Azzopardi.
Mistoqsi mill-prosekuzzjoni dwar il-laqgħa tiegħu mal-vittma, Azzopardi qal kif f’Awwissu tas-sena l-oħra rċieva telefonata mingħandu u minn hawnhekk iltaqgħu u l-vittma rrakkontalu dak li allegatament ġralu meta kellu biss tmien u disa’ snin.
Azzopardi rrakkonta d-deskrizzjoni li tah il-vittma dwar kif allegatament abbużah Dun Ġużepp Sultana, fosthom fil-kamra tal-qrar u anke fis-sala tal-Kapitlu.
Fix-xhieda tiegħu Andrew Azzopardi tenna li l-vittma ma riedx imexxi r-rapport għand il-Pulizija, u li huwa kien informa lill-Isqof Mario Grech, illum Kardinal u lill-Isqof preżenti Dun Anton Teuma biex l-akkużati ma jibqgħux iqaddsu.
L-Isqof t’Għawdex Anton Teuma qal kif xi sena u nofs ilu, il-ġenituri tal-vittma, li dakinhar ma kinux jafu bl-allegat abbużi, talbuh biex jgħin lil binhom dwar problemi oħra. L-Isqof Teuma taħt ġurament xehed li f’waħda mis-sessjonijiet il-vittma kien qallu “Dun Anton jien ġejt abbużat”. Minn hawn hu baqa’ jsegwi l-każ sakemm il-vittma żvela miegħu l-ismijiet tal-qassisin. Bħala ragħaj tad-Djoċesi, Teuma qal li huwa kellu kuntatt mas-saċerdoti għax apparti li huma sħabu fis-saċerdozju huwa wkoll “missierhom”.
Fuq il-pedana tax-xhieda tela’ Fr. Dominic Sultana, li spejga li miegħu, il-vittma fetaħ qalbu fuq abbuż, iżda kien kostrett jgħidlu li peress li ma kinux fi qrara waqqfu u spjegalu biex imur għand il-pulizija jew is-Safeguarding Commission.
Huwa tah il-kuntatt ta’ Andrew Azzopardi u fehmu biex joħroġ fil-pubbliku.
Fil-jum li l-vittma għamel ir-rapport ma’Azzopardi, Dun Dominic ħallih jgħidlu l-ismijiet.
Hawnekk iddikjara li bħala persuna li jaf mill-qrib lill-imputati qal li qatt ma ra għajn ħażina minnhom.
Xehed ukoll Monsinjur Karm Refalo, l-Arċipriet tax-Xagħra, li ddeskriva kif inhi s-sagristija.
Mistoqsi dwar il-kamra tal-qrar li fiha kien iseħħ l-allegatament abbuż, l-Arċipriet qal li kienet tintuża għaċ-ċempil u mhux għall-qrar.
Dwar is-sala tal-Kapitlu, li wkoll ġie allegat li seħħ abbuż fiha, qal li din tintuża b’mod rari, jekk eżempju jiġi l-Isqof jew festi oħra għax hemm affarijiet prezzjużi fiha.
Dwar l-aċċess għal din is-sala qal li għandu ċ-ċwievet għaliha biss is-sagristan.
Wara din ix-xhieda daħal fl-awla Dun Ġużepp Cini, fejn intlaħaq ftehim biex l-ewwel xhieda ta’ Monsinjur Karist Sultana, Dun Dominic Sultana u Mons Karm Refalo tibqa’ tgħodd għal din is-seduta wkoll.
Fuq il-pedana tax-xhieda Andrew Azzopardi saħaq kif meta kien qed jiġi investigat Cini qallu li lill-vittma qatt ma daħlu d-dar iżda ġieli daħħal tfal oħra u vera kien ithom flixkun luminata u anke flus.
Warajh reġa’ xehed l-Isqof Teuma fejn ħareġ kif f’messaġġ li hu kien bagħat lil Dun Dominic Sultana kien qallu kif il-vittma kien jgħawweġ il-fatti.
Intant, fiż-żewġ seduti l-Avukat Difensur Angele Formosa talbet għall-ħelsien mill-arrest, talba li ma sabitx oġġezzjoni mingħand il-Prosekuzzjoni.
Għal dan il-Maġistrat qalet li din it-talba trid tiddeċidiha l-Avukat Ġeneral wara li jitressaq rikors.
Għalhekk il-qassisin baqgħu jinżammu taħt arrest fil-ħabs ta’ Kordin.
