Illum aktar minn 29,000 student jirritornaw fuq il-bankijiet tal-iskola għal sena skolastika ġdida, wara l-btajjel tas-sajf.
Dawn l-istudenti jinkludu dawk li jattendu mill-ewwel sena tal-Primarja sal-ħdax-il sena tas-Sekondarja.
L-istudenti se jibdew mill-ġdid l-iskola wara li l-edukaturi daħlu ftit tal-jiem ilu sabiex lestew l-aħħar preparamenti biex jilqgħu lit-tfal.
B’kollox, f’din is-sena skolastika hemm aktar minn 8,200 edukatur fl-iskejjel tal-Istat. Dawn jinkludu mitejn, ħamsa u tletin (235) professjonist ġdid, fosthom edukaturi, u ġew mġedda ħames mija erbgħa u erbgħin (544) kuntratt ta’ professjonisti oħrajn.
Imbagħad, fl-ewwel ta’ Ottubru, kważi sitt elef student se jibdew għall-ewwel darba fil-livell ta’ Kindergarten.
F’dan il-jum, l-istudenti se jkunu qegħdin iżanżnu l-iskejjel tal-Imsida u r-Rabat, Għawdex, li fl-aħħar żmien sar investiment massiċċ fuqhom.
