Wara xhur ta’ stennija, illejla ONE ser ikun qed iwassal programm ġdid, Brillanti. Brillanti ser ikun programm b’emozzjonijiet u sorpriżi li jippremja t-talent lokali.
Din is-sena Brillanti tefa’ ħarstu lejn il-mużiċisti Maltin u Għawdxin li fil-gżejjer tagħna għandna bil-bosta.
‘Il fuq minn 200 applikant ittantaw xortihom f’din il-kompetizzjoni però ħamsa biss jistgħu jgħaddu għall-finali biex fl-aħħar mill-aħħar jintgħażel ir-rebbieħ.
Ir-rebbieħ f’din il-kompetizzjoni se jirbaħ €10,000 u l-opportunità li jdoqq ma’ orkestra professjonali barra minn xtutna, kollox imħallas grazzi għall-Fondazzjoni Ewropea għall-Appoġġ tal-Kultura.
ONE News tkellem mal-preżentatur ta’ dan il-programm Joseph Chetcuti fejn spjega kif dan il-programm ilu maħsub għal iktar minn tliet snin u kien hemm preparazzjoni kbira biex jittella’ programm b’daqsekk dedikazzjoni.
“Dan huwa proġett li ilu jinħema għal dawn l-aħħar tlieta erba’ snin. Dan huwa proġett fejn aħna se niffukaw fuq it-talent Malti li s’issa biex ngħidu hekk qatt ma ġie ippremjat b’kemm bi programm live prime time kif ħa jkun issa ħa jkun il-Ġimgħa filgħaxija fit-tmienja u nofs imma ukoll għaliex ir-rebbieħ ta’ din il-kompetizzjoni televiżiva, se jirbaħ għaxart elef ewro cash u l-opportunità li jmur idoqq barra minn Malta ma’ orkestra barranija lil hinn minn xtutna kollox imħallas.”
Joseph Chetcuti qal kif kull staġun ġdid, Brillanti se jkun qed jdawwar l-attenzjoni tiegħu fuq setturi differenti fi ħdan ix-xena mużikali.
“Din is-sena se niffukaw fuq il-mużiċisti, is-sena li ġejja se jkun hemm fuq iż-żfin, fuq id-danza mill-ballet sal-hiphop, ta’ wara teatru. Din is-sena ovjament għax jiena vjolonist u mużiċist iffukajna u bdejna fuq il-mużiċisti.”
F’dan il-programm se jkun hemm preżenti tliet ġurija professjonali li se jkunu qed jiġġudikaw bosta talenti li jittresqu quddiemhom f’Dar il-Mediterran għall-Konferenzi, l-Belt.
L-ewwel membru tal-ġurija ma huwa ħadd ħlief, Albert Storace, b’aktar minn erbgħin sena fil-mużika klassika u l-opra. It-tieni membru tal-ġurija hija s-sopran Nicola Said, u ma’ Albert u Nicola, se jingħaqad Wayne Marshall, pjanist ta’ fama internazzjonali li żgur li ser jagħti valur lill-grupp ta’ ġudikanti.
Fl-aħħar Chetcuti spiċċa bil-frażi li tispikka f’dan il-programm fejn tispjega li kulħadd qed ifittex dik il-persuna li hija brillanti.
“Jien inwiegħed it-telespettaturi li se tkun produzzjoni eċċellenti mhux biss il-filmati, l-emozzjonijiet u s-sorpriżi u anka l-istejjer ta’ dawn iż-żgħażagħ ta’ talent enormi mużikali imma wkoll bħala produzzjoni li ħa tkun magħmula mill-Maltin anzi mill-Matin u l-Għawdxin kważi aħjar, għall-Maltin u l-Għawdxin li jixraqilhom dejjem l-isbaħ u l-aħjar. U kif ngħidu aħna fil-programm għax din hija l-catchphrase tagħna, huma ħafna dawk li jafu jdoqqu, ftit il-bravi imma wieħed jew waħda biss brillanti. ”
