Mil-lejla Tana Tnejn jibda fuq it-televiżjoni. Sibna lil Luke u Glenn deħlin għall-programm tar-Radju u għamilna ftit domandi. Bejn battuta u oħra dawn kienu t-tweġibiet tagħhom.
- Għalfejn iddeċidejtu li apparti fuq ir-radju issa ser tkunu qed tagħmlu Tanatnejn fuq it-TV?
L-istil differenti ta’ kif twassal messaġġ politiku kien is-suċċess ta’ Tanatnejn fuq ir-radju. Tanatnejn irnexxielu joħloq bilanċ bejn programm politiku li fih informazzjoni dwar dak li jkun għaddej fil-politika, iżda fl-istess ħin huwa wkoll programm satiriku. Il-Maltin mdorrijin jieħdu l-politika wisq bis-serjeta, allura meta jkollok stil satiriku fuq suġġett serju, f’dan il-każ għamel differenza kbira u l-popolarita tal-programm qed tikber. It-televiżjoni huwa medium importanti ħafna wkoll u għalhekk, se nippruvaw li l-popolarita tal-programm fuq ir-radio nesportawha għat-TV għaliex hemm opportunitajiet ta’ kif wieħed jgħid dak li għandu jgħid mingħajr ma jkun tedjanti.
- X’inhuma l-karateristici ta’ Luke Dalli u Glenn Bedingfield li ser joħorġu aktar fuq it-Televiżjoni?
Il-karatteristiċi tagħna, jibqgħu dawk li huma,żewġ persuni li jħobbu l-politika, li twieldu fil-politika u jgħixuha kull jum pero fl-istess ħin inħobbu nidħku ukoll u dik tagħmel differenza kbira. Li wieħed ikun jaf jidħak, speċjalment jekk ikun jaf jidħak bih innifsu! Bħalma hu l-każ tagħna.
- Kif ser ikun imqassam il-programm tat-Televiżjoni ?
Aħna ma jaħrabilna xejn! U m’hu se nħallu xejn barra tinkwetawx.L-istil tal-programm se jkun dak li dejjem nafuh, iżda naturalment irid ikun addattat għal medium differenti. Iżda ma rridux nagħmlu politika biss. Nixtiequ li anke t-telespettaturi jibgħatulna videos tagħhom jew videos li jkunu ltaqgħu magħhom online ħalli l-programm ikun iktar mżewwaq bl-involviment dirett tat-telespettaturi u minn Tanatnejn jispiċċa programm ta’ kulħadd, jew nistħgu ngħidu Tagħna Lkoll!
Tanatnejn TV ser jibda llejla wara l-aħbarijiet tas-7.30pm. Nissuġġerixxu li ma titilfuħx jekk tħobbu l-politika u tħobbu tidħku.
