Illejla, fil-Port il-Kbir, ser jintlaħaq il-qofol tal-Festival internazzjonali tan-nar.
L-attività tal-lejla ser timmarka t-tmiem ta’ dan il-festival li żar diversi lokalitajiet madwar il-gżejjer Maltin.
Dan il-festival mill-bidu tiegħu attira l-għajn ta’ diversi dilettanti tan-nar kif ukoll dawk li sempliċiment jixtiequ jaraw xena spettakolari quddiem għajnejhom.
Iżda l-Port il-Kbir mhux ser ikun unikament responsabbli għall-għeluq ta’ dan il-festival hekk kif fuq il-Fosos fil-Floriana, wieħed jista’ jitpaxxa bi spettaklu tan-nar tal-art.
L-organizzaturi ta’ dan il-festival wissew li ser ikun hemm aċċess ristrett skont il-ħin għal ċerti toroq filwaqt li opri tal-baħar kummerċjali jew privati li m’għandhomx permess apposta, mhux ser jitħallew jimirħu fil-Port il-Kbir matul il-festival.
