Permezz ta’ din l-iskema, il-wirt nazzjonali li jinsab fl-irħula u l-ibliet ta’ pajjiżna se jiġi vvalorizzat.
Hekk stqarrew ma ONE News is-Sindku ta’ Ħal Kirkop u taż-Żejtun dwar l-iskema maħruġa mid-Direttorat tar-Restawr fi ħdan il-Ministeru għall-Wirt Nazzjonali, l-Arti, u l-Gvern Lokali b’konsultazzjoni mad-Direttorat għall-Implimentazzjoni tal-Istrateġija u l-Politika fi ħdan id-Diviżjoni tal-Gvern Lokali.
Din hija s-seba’ sena li fiha nħarġet din l-iskema ta’ restrawr, li permezz tagħha diġà saru 39 proġett: tletin minnhom tlestew u l-kumplament waslu biex.
Din is-sena, għall-ewwel darba minn mindu tnediet l-iskema, se jsiru l-proġetti kollha li saret applikazzjoni dwarhom f’din l-iskema.
Fosthom hemm statwi, niċeċ, monumenti, u strutturi storiċi li jsebbħu l-lokalitajiet tagħna.
Fost il-wirt storiku li se jibbenefika minn restawr insibu l-Knisja ta’ San Klement fiż-Żejtun.
Il-knisja nbniet minn Klement Tabone fl-1622 wara li kien qala’ l-permess papali biex jagħmel kappella ddedikata lil San Klement għax kien qala’ l-grazzja biex l-Ordni ta’ San Gwann tirbaħ kontra t-Torok.
Minn din il-knisja toħroġ ukoll il-purċissjoni nhar San Girgor, li mbagħad tibqa’ sejra għall-Knisja ta’ Santa Katerina l-Antika, li kienet il-knisja parrokkjali taż-Żejtun qabel ma nbniet il-Knisja tal-lum.
Is-Sindku ta’ Żejtun, Doris Abela, qalet li li ż-Żwieten kienu ilhom jistennew bil-ħerqa dan ir-restwar.
“Bħala Kunsill Lokali, huwa importanti ħafna dan ir-restawr għaliex bis-saħħa tiegħu qegħdin Inkomplu nippreservaw postijiet u wirt patrimonjali li ħallewna ta’ qabilna. ”
Tal-istess fehma kien is-Sindku ta’ Ħal Kirkop, Terence Agius.
f’Ħal Kirkop se jkun qiegħed jiġi rrestawrat Is-Salib tad-Dejma.
Dawn l-istrutturi huma parti integrali minn bosta ċentri lokali tal-irħula u tal-bliet f’pajjiżna.
Dawn kelhom rwol importanti fid-difiża ta’ dawn il-gżejjer fil-Medjuevu.
Hekk kif l-attakki mill-Ottomani laħqu l-qofol tagħhom f’dak iż-żmien, in-nies tal-lokal iddeċidew li jwaqqfu l-milizzja tagħhom stess.
Gruppi ta’ milizzji lokali kienu joqogħdu għassa fit-torrijiet tal-kosta. Kull meta kien jintlemaħ galjun tal-għadu, kienu jqajmu allarm u jibagħtu sinjali permezz tan-nar u d-duħħan lejn iċ-ċentri tal-bliet u tal-irħula.
In-nies imbagħad kienu jiltaqgħu ħdejn is-salib viċin tagħhom biex ikunu lesti biex jinterċettaw lill-għadu.
Is-Sindku ta’ Ħal Kirkop spjega li skemi bħal dawn ma jħallux strutturi ta’ valur storiku jintelqu, filwaqt li ssaħħaħ is-sussidjarjetà tal-Kunsilli Lokali.
“Skema li, ovvjament, hija ta għajnuna għall-Kunsilli Lokali sabiex verament il-wirt nazzjonali inkunu qegħdin nippreservawh u jsir dak ir-restawr li għandu bżonn.”
