Il-Ministeru għall-Kultura, waqqaf Board li għandu l-inkarigu li jimplimenta l-politika nazzjonali dwar il-qasam tal-wirt kulturali intanġibbli ta’ pajjiżna. Wirt li minkejja li ma ma tistax tmissu huwa parti mill-kultura ta’ Malta, ezempju l-lingwa Maltija.
Dan il-Board twaqqaf fuq parir mill-esperta nominata mill-UNESCO, Marina Calvo, li kienet preżenti f’Malta lejn il-bidu ta’ din is-sena sabiex tidderiegi lid-Direttorat tal-Kultura dwar kif għandha titwaqqaf struttura nazzjonali u jingħata bidu għall-proċess ta’ inventarju nazzjonali.
Dan l-Bord ser jilqa’ applikazzjonijiet u jagħmel ir-rakkomandazzjonijiet tiegħu dwar jekk il-proposti mill-komunità jistħoqqilhomx ikunu fuq l-inventarju nazzjonali.
Wara dan il-proċess, numru ta’ elementi tal-wirt kulturali se jiġu proposti għan-nominazzjoni għal-lista tal-UNESCO tal-wirt kulturali intanġibbli, li permezz tagħha jinkiseb rikonoxximent dinji tagħhom.
Hemm tliet kategoriji li fihom tista’ titressaq nominazzjoni:
· Elementi ta’ wirt kulturali intanġibbli li jeħtieġ ħarsien immedjat sabiex ma jintilifx;
· Lista rapprezentattiva ta’ elementi ta’ wirt kulturali intanġibbli li jsaħħu d-diversità fil-komunità u l-ħtieġa li jiżdied l-għarfien tal-importanza ta’ dan l-element;
· Reġistru ta’ prattiċi tajba ta’ programmi, proġetti u attivitajiet li qed iseħħu fil-qasam tal-wirt kulturali intanġibbli, sabiex permezz ta ‘ dawn il-prattiċi tajba dawn jgħaddu minn ġenerazzjoni għall-oħra.
B’dan kollu huwa possibbli minħabba li f’Marzu tal-2017, il-Parlament Malti approva b’mod unanimu li jirratifika l-Konvenzjoni tal-2003 tal-UNESCO dwar il-Ħarsien tal-Wirt Kulturali Intanġibbli. Wara li saret ir-ratifikazzjoni uffiċjali mal-UNESCO, seta’ jinbeda dan il-proċess biex inħarsu u nippromwovu l-wirt kulturali intanġibbli tagħna.
Il-Board għandu bħala Chairman lis-Sur Frank Zammit, filwaqt li l-membri huma Dr J.P. Baldacchino, is-Sur Joseph Magro Conti, is-Sur Kenneth Gambin u s-Sur Mario Azzopardi, u għandu bħala segretarja lis-Sinjura Melanie Ciantar Harrington.
Il-Ministeru għall-Ġustizzja, Kultura u Gvern Lokali ħoloq is-sit https://www.ichmalta.org sabiex jiggwida lill-applikanti interessati. Hemm ukoll il-formola biex il-proposta titniżżel u tkunikkunsidrata biex titpoġġa fl-inventarju nazzjonali.
Matul il-konferenza tal-aħbarijiet, il-Ministru għall-Kultura, Owen Bonnici, qal li “nistgħu, bi kburija, ngħidu li l-gżejjer tagħna huma mgħonija b’ wirt kulturali imprezzabli li hu apprezzat mill-pubbliku, kif ukoll imfittex minn ħafna turisti. Dan il-Gvern qiegħed juri impenn bi strateġija għall-ħarsien tal-wirt kulturali intanġibbli tagħna, kif ukoll biex dan ikun ippreservat u mgħoddi lil ta’ warajna.”
