Il-Wasteserv ingħaqdet fit-tfittxija għal Buddy, il-kelb tar-razza Jack Russel li ilu mitluf għal madwar disat ijiem.
Ħabbar dan iċ-Chairman tal-Wasteserv, David Borg, li f’messaġġ fuq Facebook kiteb kif it-tim tal-Wasteserv se jgħin fil-missjoni biex jirritorna lil Buddy lura ma’ familtu hekk kif Buddy jinsab idur fl-inħawi tal-Magħtab.
Kien proprju lbieraħ li Buddy ntlemaħ jiġri fil-kumpless tal-Wasteserv, fil-Magħtab, minn persuna li ngħaqdet fit-tfittxija biex isibu lil Buddy.
Għal dawn l-aħħar disat ijiem bosta persuni, ħbieb u qraba tal-familja ta’ Buddy ingħaqdu flimkien biex isibu lil Buddy u jirritornawh lura d-dar.
Madwar disat ijiem ilu Buddy ħarab waqt li kien qed jinżamm minn persuna kompetenti waqt li familtu kienet fuq btala, bil-konsegwenza li ntilef.
