L-emendi fil-liġi dwar l-IVF se jitpoġġew quddiem il-membri parlamentari fil-mitt jum minn mindu bdiet leġiżlatura ġdida taħt it-tmexxija tal-Prim Ministru Robert Abela.
Matul il-kampanja elettorali għall-elezzjoni ġenerali ta’ Marzu li għadda, il-Partit Laburista wiegħed li f’mitt jum ta’ Gvern ġdid Laburista dawn l-emendi se jkunu qegħdin jgħaddu mill-Parlament.
Dawn l-emendi fil-liġi tal-IVF se jwasslu biex aktar nies ikunu jistgħu jsiru ġenituri.
Fost l-emendi hemm li jiżdiedu n-nies li jgawdu mill-proċess tal-IVF bla ħlas, bl-età togħla għal ħamsa u erbgħin sena, jiżdiedu ċ-ċikli tal-IVF mingħajr ħlas, u s-servizz jiġi offrut anki lil min diġà għandu l-ewwel wild.
Din l-emenda se tkun qed tagħti aktar aċċess lit-tobba u l-ispeċjalisti sabiex jagħmlu użu aħjar mill-aħħar teknoloġija medika biex jiġu evitati stejjer ta’ qsim il-qalb, għax ikun hemm ċertezza li t-trabi jmutu fi ftit ġimgħat jew xhur wara minn meta jkunu twieldu.
It-Tnejn waranofsinhar, fil-Parlament tlaqqa’ l-Kumitat Permanenti għall-Konsiderazzjoni ta’ Abbozzi ta’ Liġi, fejn kien hemm qbil dwar l-emendi f’din il-liġi.
Dan il-kumitat reġa’ tlaqqa’ wara li, il-ġimgħa li għaddiet, l-Oppożizzjoni Nazzjonalista għamlet tentattiv biex tieħu l-liġi tal-IVF lura minflok ’il quddiem. Dakinhar, l-Oppożizzjoni ressqet emenda li biha saħansitra lanqas riedet li l-proċess tal-IVF isir meta ġie diskuss il-PGTM.
