F’dinja ddominata mill-Internet, il-ħanut ta’ Damato Records, fil-qalba tal-Belt Valletta, hu l-eqdem ħanut tad-diski fid-dinja – u ilu jimmeravilja lil dawk kollha li jterrqu qalb it-toroq tal-kapitali sa mis-sena 1885.
Il-legat ta’ dan il-ħanut baqa’ ħaj, hekk kif din l-imħabba għall-mużika baqgħet tintiret minn ġenerazzjoni għal oħra.
Saħansitra baqa’ miftuħ saħansitra fi żmien li pajjiżna kien l-aktar post ibbombardjat fid-dinja, fit-Tieni Gwerra Dinjija, meta l-binjiet kollha tal-madwar kienu wkoll qed jiġġarrfu.
Dak iż-żmien, kif kienet il-perċezzjoni u anke l-attitudni ġenerali madwar id-dinja, sid id-Damato Music Store emmen bis-sħiħ li l-mużika kienet bżonnjuża biex toħloq u żżomm sentiment pożittiv, anke fl-agħar żminijiet tal-gwerra.
Illum il-ġurnata, fi żminijiet kompletament differenti, skoprejna partikolarment kif, bħal għexieren ta’ snin ilu wkoll, partikolarment mill-ħamsinijiet sas-sebgħinijiet, iż-żgħażagħ qed jerġgħu jirrikorru għax-xiri tal-vinyls.
Dan anke jekk it-teknoloġija, maż-żmien, issuperat l-era tat-turntables, li jiftakru sew dawk li llum qabżu l-ħamsin sena u aktar, u llum ħafna jagħżlu l-verżjoni diġitali tal-mużika minflok dik fiżika.
Crew minn dan l-istazzjon żar il-ħanut storiku ta’ Damato biex anke nistaqsu dwar liema huma l-aktar artisti mfittxijin jew l-aktar ġeneru ta’ mużika għal qalb il-poplu Malti.
Qal, “Bħala artista definittivament Taylor Swift – l-aktar kantanta li nbiegħu u verament popolari. Lana Del Rey inbiegħu ħafna, u aħna magħrufin ukoll għar-rock klassiku, tas-sebgħinijiet, sittinijiet – Pink Floyd, Led Zepplin, Queen, Iron Maiden… Ikolli ngħid l-aktar ġeneri li nbiegħu huma l-Pop tal-lum, l-aktar diski popolari u r-rock klassiku, taż-żminijiet tad-deheb, iż-żmien sittin, sebgħin u anke t-tmenin.”
Damato żied jiddeskrivi dan bħala fenomenu, hekk kif il-vinyls illum il-ġurnata kisbu aktar popolarità minn qatt qabel.
Qal, “Dan hu fenomenu. Iż-żgħażagħ qegħdin jiġu lura fil-ħanut tagħna jixtru l-vinyl. Il-vinyl hi popolari kif kienet fiż-żmien tal-età tiegħi u akbar minni, issa l-vinyl huwa rikjest ħafna miż-żgħażagħ. Jiġu apposta biex jixtru l-vinyl u jekk ma jsibux anke nordnawlhom affarijiet li jkunu jridu speċifikament u ma jkollniex hawnhekk.”
Fil-passat, dan il-ħanut kien iservi wkoll biex jagħti pjattaforma lill-artisti lokali, hekk kif kien iservi wkoll bħala record label.
Spjega kif, għal xi żmien, il-vinyls u s-CDs kienu saru ħafna inqas popolari, speċjalment meta bdiet tavvanza t-teknoloġija, iżda llum il-ġurnata dawn reġgħu kisbu l-glorja mistħoqqa.
Qal, “Hawn interess kbir għall-mużika. Għandek ħafna kantanti qegħdin joħorġu materjal ġdid. Il-vinyl hawn craze kbira fuqu, jiġifieri sejjer tajjeb ħafna u, bis-saħħa tagħhom, is-CDs reġgħu bdew jinbiegħu aktar. Bis-saħħa tal-mużika, il-vinyl reġgħet ħadet revival.”
U fuq dik in-nota melodjuża, ħallejna lis-Sur Damato biex ikompli man-numru ta’ żgħażagħ, li laħqu nġabru fil-ħanut, jistennew ħerqana biex jixtru xi vinyl jew tnejn.
