Il-Viċi Kap Nazzjonalista David Agius ma kienx jaf lanqas jgħid kemm ser ikun l-ammont ta’ dejn għal pajjiżna biex Bernard Grech iwettaq il-wegħda ta’ biljun ewro jekk ikun Prim Ministru.
Colin Deguara: “Tafu tgħidu lin-negozji eżattament kemm minnu ser ikun self? U dawk li diġa qiegħdin fis-settur joperaw, jistgħu jibbenefikaw minnu?”
Agius, li qed jaspira li jkun Deputat Prim Ministru f’inqas minn xahar, deher skomdu għall-aħħar meta mistoqsi dwar liema ċifra ta’ self hija tajba, jekk hux dik ta’ 50% mħabbra minn Bernard Grech jew dik fil-manifest Nazzjonalista ta’ 70%.
Minflok Agius infexx jitkellem dwar kollox barra dwar dak li staqsejnieh u mistoqsi għad-dettalji, waqt kampanja elettorali qal li mhemmx għaġla.
Colin Deguara: “Qed tieħu l-ħin biex taħsibha onorevoli Agius?”
David Agius: “M’għandniex għaġla. L-elezzjoni fis-26 ta’ Marzu m’għandniex għaġla.”
Colin Deguara: “Le le, għax staqsejtek mistoqsija u għadek ma tajtnix tweġiba dwar proposti tiegħek stess.”
David Agius: “Għandek xi għaġla? Għandek xi għaġla?”
Colin Deguara: “Għax dejjem iddumu titkellmu dwar ħafna affarijiet u tweġbuniex. Il-bieraħ l-istess għamel il-Kap tiegħek.”
David Agius: “Ħa titkellem inti?”
Colin Deguara: “Le le qed nistaqsik għax m’intix twieġeb.”
David Agius: “Lest? Thankyou. Ser tħallini nwieġeb.”
Colin Deguara: “Nisperaw li tweġibni.”
David Agius: “Grazzi. Mhux qed nagħmlu dibattitu hawnhekk. Meta trid stedinni u nagħmlu dibattitu.”
Colin Deguara: “Għax jekk nistaqsik fuq ‘A’ ma tweġibnix fuq l-alfabett kollu u ma tweġibnix fuq ‘A’. Le?”
Wara li l-Partit Nazzjonalista ħareġ sejħa biex il-ġurnalisti jattendu konferenza stampa biex jagħmlu l-mistoqsijiet tagħhom, David Agius spiċċa jgħid lill-ġurnalist ta’ ONE News biex jistiednu fuq programm jekk irid it-tweġibiet.
David Agius: “Meta trid stedinni fuq il-ONE, niġi u għamilli d-domandi li trid.”
Colin Deguara: “Jien ġurnalist, jaħasra qed nagħmillek id-domandi u lanqas qed tweġibhom hux.”
David Agius: “Jien qed inwieġbek. Qed inwieġbek kif nixtieq jiana u kif jidhirli jiena. Inti staqsi d-domandi li tixtieq…”
Colin Deguara: “Mhux fuq il-proposti li qed nistaqsik dwarhom u n-nies jarawh dan.”
David Agius: “Ħalli nwieġbek fuq il-pensjonijiet.”
Colin Deguara: “Fuq il-pensjonijiet?!”
David Agius: “U qed jistaqsina wkoll dwar il-biljun ewro. Il-biljun ewro semmejtu jien ukoll.”
Iżda fl-aħħar ma setax ikompli jaħrab u kkonferma li l-Partit Nazzjonalista għadu jrid jara kif ser iġib il-flus.
Dan filwaqt li bqajna ma ingħatajna l-ebda dettall dwar kemm mill-biljun ewro ser jissarraf f’dejn għall-pajjiż.
David Agius: “Il-Partit Nazzjonalista ser ikun qed jara l-metodu kif isib il-flus, kif spjega l-kap tal-Partit Nazzjonalista, hemm minnhom li ħa jkunu self u hemm minnhom li ser ikunu.”
Colin Deguara: “Kemm persentaġġ? Kemm persentaġġ? Sempliċi din ta. Għadek kif ikkonfermajt li ma tafx ta.”
