Tnieda l-programm tal-Milied f’Għawdex 2023 hekk kif il-Ministru għal Għawdex Clint Camilleri ħabbar li l-grupp internazzjonali Venga Boys se jkun il-mistieden speċjali għall-attività ta’ lejlet l-Ewwel tas-Sena, fir-Rabat, Għawdex. Huwa ħabbar dan waqt li żar il-preparamenti li qegħdin isiru f’Għawdex għall-festi tal-Milied u ltaqa’ mal-ħaddiema u mal-voluntiera li jaħdmu qatigħ minn sena għall-oħra sabiex iżejnu t-toroq u l-pjazez u jtellgħu l-aqwa attivitajiet fil-gżira Għawdxija.
Mill-24 ta’ Novembru 2023 sas-7 ta’ Jannar 2024 f’Għawdex se jittella’ programm b’bosta avvenimenti ta’ interess għall-familja kollha. Il-Ġimgħa, 24 ta’ Novembru, l-kunċert mingħajr ħlas “Christmas it’s Time” fit-Teatru tal-Opra Aurora, il-Belt Victoria, se jiftaħ l-attivitajiet tal-Milied. Il-qofol imbagħad se jintlaħaq lejlet l-ewwel tas-sena b’kunċert mill-isbaħ fi Pjazza Indipendenza fir-Rabat, Għawdex bil-parteċipazzjoni ta’ diversi kantanti u artisti lokali fosthom, DCapitals Big Band, MiciMago, Ryan Spiteri, Clint Bajada u Ozzy Lino u l-mistiedna internazzjonali Venga Boys.
“Qed inkomplu nassistu sabiex insaħħu t-tradizzjonijiet tagħna. Nirringrazzja lill-organizzaturi u lill-voluntiera għall-ħidma tagħhom sabiex il-‘Milied f’Għawdex 2023’ ikun ukoll wieħed ta’ suċċess. Dawn flimkien mad-Direttorat għall-Wirt Kulturali fi ħdan il-Ministeru jaħdmu bla heda sabiex ta’ kull sena jitwassal programm varjat b’bosta avvenimenti. Fosthom insibu l-Parata tal-Milied fi Triq ir-Repubblika, Victoria, Christmas Magic – Għar Ilma, Santa Luċija, Dinja tat-Tfal fil-Ġonna ta’ Villa Rundle kunċerti u diversi presepji tradizzjonali Għawdxin.” Huwa semma wkoll li din is-sena se jerġa’ jsir il-presepju ħaj – Betlehem f’Għajnsielem.
Il-Ministru Camilleri temm billi stieden lil kulħadd iżur Għawdex f’dawn il-jiem sabiex igawdi minn avvenimenti u attrazzjonijiet f’bosta rħula li minn sena għall-oħra qegħdin ikunu ta’ kwalità għolja tant li jattiraw diversi viżitaturi lejn il-gżira.
Għal aktar informazzjoni dwar l-attivitajiet kollha li se jittellgħu f’Għawdex wieħed jista’ jidħol fuq is-sit eventsingozo.com jew jara l-programm minn https://issuu.com/visitgozo/docs/christmas_in_gozo_2023.
