Il-qrubija li Bernard Grech qed juri bejn il-Partit Nazzjonalista u l-għaqdiet Repubblika, Occupy Justice u Manuel Delia qed tkun sors ta’ firda ġdida fil-Partit li jmexxi.
Bl-aħħar stħarriġ fuq it-Times juri li l-appoġġ għat-tmexxija ta’ Grech qed ikompli jonqos, fazzjoni fil-Partit qed turi n-nuqqas ta’ qbil tagħha għall-qrubija li kull ma jmur qed tispikka bejn il-Partit Nazzjonalista u l-għaqdiet Repubblika, Occupy Justice u l-eks Chief of Staff ta’ Austin Gatt, Manuel Delia.
Iżda konxji ta’ dawn il-pressjonijiet mill-fazzjoni opposta d-deputati Nazzjonalisti tal-fazzjoni Busuttil qed iżidu l-pressjoni sabiex dawn l-għaqdiet jingħataw iżjed prominenza fil-Partit Nazzjonalista.
Turija ċara ta’ dan kienet l-aħħar protesta li saret quddiem Kastilja minn dawn l-istess għaqdiet fejn għaliha kien hemm preżenti d-deputati kollha sinonimi mal-fazzjoni Busuttil.
Saħansitra dawn id-deputati bdew jagħtu l-flus fil-bramel tal-ġbir.
Sorsi qrib sew tal-Kap Nazzjonalista qalulna kif hemm numru ta’ deputati qrib tal-eks Kap Nazzjonalista Adrian Delia li mhux jaqblu mal-qrubija li Grech irid mal-għaqdiet Repubblika, Occupy Justice u ma’ Manuel Delia.
Min-naħa l-oħra Grech qed ikun magħfus sabiex juri l-appoġġ tiegħu mid-deputati tal-establishment.
Persuni qrib sew tal-Kap Nazzjonalista u li llum jokupaw karigi fil-partit wkoll kienu preżenti għall-attività tal-għaqdiet qrib il-fazzjoni ta’ Simon Busuttil.
Fost dawn kien hemm il-kelliem tal-Kap Nazzjonalista Peter Agius u s-Segretarju Ġenerali Michael Piccinino.
Fost id-deputati tal-Partit Nazzjonalista kien hemm ukoll Jason Azzopardi li kif wasal fi pjazza Kastilja dlonk mar ifesfes f’widnejn il-President tal-Għaqda Repubblika Robert Aquilina.
Imqabbda ma’ djul Jason Azzopardi kien hemm ukoll id-Deputati Nazzjonalisti David Thake u Karl Gouder.
Dan filwaqt li jisimgħu għad-diskorsi ta’ Manuel Delia u ta’ Robert Aquilina b’devozzjoni kien hemm ukoll Karol Aquilina, Claudette Buttigieg, Beppe Fenech Adami u Therese Comodini Cachia.
Kien hemm preżenti wkoll l-ewroparlamentari Nazzjonalista Roberta Metsola.
Sorsi qalulna kif il-preżenza ta’ din tal-aħħar kienet manuvra biex togħkor għajn Bernard Grech.
Dan hekk kif Metsola hija meqjusa li għandha ċertu awtorità mal-establishment Nazzjonalista.
Dan anke aktar milli għandu hu stess mal-istess deputati.
