F’deċiżjoni f’kawża dwar ordnijiet ta’ ffriżar tal-assi, b’rabta mal-inkjesta tal-isptarijiet, l-Imħallef Edwina Grima l-Ġimgħa filgħodu qalet li l-persuni li ressqu din il-kawża jistgħu jsejħu lill-esperti, li ħadmu fuq ir-rapport, biex jixhdu.
L-Imħallef Grima kkundannat bis-sħiħ l-aġir tal-espert ewlieni fl-inkjesta, l-Irlandiż Jeremy Harbinson, fejn qalet li dan, mingħajr raġuni valida, qed jirrifjuta li jixhed, anke jekk il-Qorti poġġiet għad-dispożizzjoni tiegħu mezzi biex ikun jista’ jagħmel dan minn pajjiżu, flok jiġi Malta.
Hi spjegat kif Harbinson talab lill-Qorti biex ma jsirx aktar kuntatt miegħu u saħqet li din l-imġieba ċertament tikkostitwixxi disprezz lejn l-awtorità tal-Qorti.
Żiedet li, madankollu, se jkun hemm diffikultà biex l-ordnijiet tagħha jiġu esegwiti fil-konfront tiegħu billi dan jgħix fir-Renju Unit u, allura, lil hinn mill-ġurisdizzjoni tagħha.
L-Imħallef Grima kompliet li d-dmir ta’ kull persuna li titla’ fuq il-pedana tax-xhieda hu regolat bil-liġi Maltija u li, f’dawn il-proċeduri, fl-eventwalità li d-Difiża tkun trid tpoġġi l-mistoqsijiet lil Harbinson u dan jibqa’ ma jridx jiġi Malta tintuża l-proċedura tal-ittri rogatorji bl-assistenza tal-awtoritajiet ġudizzjarji tal-pajjiż fejn l-espert Irlandiż jgħix.
Fi kliem il-Qorti, Harbinson jibqa’ xhud kompetenti, għalkemm hemm reżistenza min-naħa tiegħu li jixhed.
L-Imħallef irrimarkat li, flimkien ma’ Harbinson fuq ir-rapport tal-inkjesta, ħadmu numru ta’ esperti oħrajn u qalet li d-Difiża tista’ ssejjħilhom ukoll biex jixhdu.
F’dan il-kuntest, il-Qorti qalet li ma tistax tneħħi r-rapport tal-inkjesta, li Harbinson qal li kkordina x-xogħol kollu fuqu qabel ma jintalbu jixhdu esperti oħrajn.
