L-eks Segretarju Ġenerali tal-Partit Nazzjonalista, illum figura kostanti fl-attivitajiet tal-għaqda Repubblika, Pawlu Borg Olivier intalab biex iressaq il-provi wara deċiżjoni tal-Qorti tal-Appell biex juri li qed jitkellem f’isem madwar ħamsin immigrant f’kawża kontra l-Prim Ministru u l-Ministru għall-Intern Byron Camilleri fost oħrajn.
Dan għax deherlu li l-Armata ma salvatx immigranti li kienu fuq il-baħar.
Borg Olivier kien qal li qed jidher għal madwar ħamsin immigrant iżda mkien ma ġab prova valida li qed jidher għalihom u li huma tawh il-prokura biex jitkellem għalihom fil-Qorti.
Pawlu Borg Olivier anki bħala avukat tal-għaqda Repubblika flimkien ma’ Jason Azzopardi kienu anki fetħu kwerela kontra s-suldati tal-Forzi Armati u l-Prim Ministru fost oħrajn.
Borg Olivier u Azzopardi kienu akkużaw bi qtil ta’ immigranti, akkuża li setgħet titfa’ lill-Prim Ministru, il-Ministru għall-Intern u s-suldati involuti f’operazzjoni ta’ salvataġġ, għal għomorhom il-ħabs.
Fuq il-każ kienet infetħet inkjesta maġisterjali li ma sabet xejn minn dak li akkużaw biha Borg Olivier u Azzopardi.
Borg Olivier lanqas kien aċċetta l-konklużjonijiet tal-inkjesta u kien infexx jattakkaha wara li din qalet ċar u tond li d-denunzja li fetaħ fosthom Borg Olivier ma kien fiha l-ebda provi mressqa.
